गठबन्धनको एकता देखेर आत्तिएका ओलीले असन्तुलित अभिव्यक्ति दिन थालेः पौडेल

६ वैशाख, काठमाडौं ।  नेपाली कांग्रेसका वरिष्ठ नेता रामचन्द्र पौडेलले सत्ता गठबन्धन ले गरेको चुनावी एकतालाई देखेर नेकपा एमालेका अध्यक्ष केपी शर्मा ओली आत्तिएको बताएका छन् । उनले अहिलेको व्यवस्थानै ओलीले सिध्याउन खोजेकाले गठबन्धन बनेको र देशलाई पार लगाएर मात्रै छुट्टिने बताएका छन् ।

मंगलबार काठमाडौंमा नेपाल विद्यार्थी संघको स्थापना दिवसको कार्यक्रममा नेता पौडेलले आत्तिएर ओलीको अभिव्यक्ति पनि सन्तुलित हुन छोडेको बताए । नेता पौडेलले अहिलेको गठबन्धन संविधान र व्यवस्था नै सिध्याउन खोज्ने ओलीको अधिनायकवादका विरुद्धमा तयार भएको बताए ।

उनले भने, ‘यो खाली शेरबहादुर देउवालाई प्रधानमन्त्री बनाउनका लागि मात्र बनेको गठबन्धन होइन । त्यसैले तपाईंहरूले गठबन्धनको भावनालाई आत्मसात् गर्नुहोस् । गठबन्धन बनेपछि ओली आत्तिएका छन् । उनी थुरुरु भएका छन् । त्यसैले उनले बोल्दा सन्तुलन समेत गुमाउन थालेको देखिँदै छ ।’

पौडेलले सरकार सञ्चालनको साटो अधिनायक बन्ने आकांक्षा देखाएर संविधान र लोकतन्त्रलाई धरापमा पारेर ओलीले नै गठबन्धन बनाइदिएको तर्क गरे । पौडेलले अहिलेको सत्ता गठबन्धनले सहमति कायम गरेर तालमेल टुंग्याउने दावी गरे ।