बर्षको एकपटक कर कार्यालय आउनुस्

स्याङ्जा । नेपाल सरकारले व्यवस्था गरेको वर्तमान राजस्व नीतिको सन्दर्भमा व्यवसायीलाई कर शिक्षा प्रदान गरिएको छ । श्रावण १ गते देखि सरकाले भीटीसीएस कर प्रणाली लागु गरेपछि अन्योलमा रहेका व्यवसायीलाई कर शिक्षा मार्फत जानकारी गराइएको हो । अनलाईन सिस्टमबाट कर असुली गर्ने प्रणालीको विकाससँगै वालिङका व्यवसायी अन्योलमा पर्दै आएका थिए ।

एक हप्ता अगाडि वालिङ उद्योग वाणिज्य संघले यो प्रणालीलाई विस्तारै लागु गर्न आग्रह गर्दै विज्ञप्तीमार्फत सरकारलाई ध्यानाकर्षण गराएको थियो । वालिङ उद्योग वाणिज्य संघको आयोजना र आन्तरिक राजस्व कार्यालय पोखराको प्राविधिक सहयोगमा कर शिक्षा कार्यक्रम आयोजना गरिएको थियो । अधिकांश व्यवसायीले सरकारले लागु गर्न खोजेको कर प्रणाली व्यवहारिक नभएको गुनासो गरेका छन् ।

व्यवसायीहरु सरकारलाई कर तिर्न उत्सुकता भएपनि झन्झटिलो परिपाटीले गाह्रो हुने गरेको व्यवसायीहरुले बताएका छन् । सहज र सरल प्रणाली लागु गर्न सकेमा साना व्यवसायीलाई करको मुलधारमा ल्याउन सहज हुने उनीहरुले बताएका छन् । व्यवसायी पुराना तर करको कानुन नयाँ आउदा कर प्रणाली अत्यन्तै झन्झटिलो महशुस भएको सहभागी व्यवसायी टिकाराम डुम्रेले बताए ।

सयौको संख्यामा सहभागी भएका व्यवसायीले उठाएको जिज्ञासाको उत्तर आन्तरिक राजस्व कार्यालय पोखराका प्रमुख केशवकुमार उप्रेतीले दिएका थिए । सरकारले ल्याएको कर प्रणाली अत्यन्तै सरल छ, तर व्यवसायी कर कार्यालयसम्म पुग्नै चाहनु हुँदैन उप्रेतीले भने,“विचौलियाका कारण कर प्रणाली झन्झटिलो महशुस भएको होला ।” खरिद र बिक्रीको हिसाबकिताव राम्रोसँग राखेर आएको फाइदाको कर तिर्न किन बिचौलियाको प्रयोग गर्ने ? उप्रेतीले व्यवसायीलाई भने ।

बर्षको एकपटक कर कार्यालयमा गएर आफ्नो खाता हेर्ने परिपाटीको बानी बसाल्न सक्ने हो भने कर के हो भन्ने सबैलाई थाहा हुने उप्रेतीले बताए । अब किन्नेले पनि बील लिने र बिक्री गर्नेले पनि बिल दिने काम गर्नु होला उप्रेतीले भने,“किन्ने र खरिद गर्ने दुवैले बिलको कारोवार नगरेमा दुवैलाई सजायको व्यवस्था छ ।” त्यसैले अनिवार्य खरिद बिक्रीमा बिलको प्रयोग गर्न नछुटाऊ, कर प्रमुख उप्रेतीले सहभागीलाई सुझाए ।

कर शिक्षा कार्यक्रममा वालिङ नगरप्रमुख दिलिपप्रताप खाँणले कर तिर्नु नागरिकको दायित्व भएको बताए । कर प्रणालीको कानुनलाई सरल र जनताले बुझ्ने खालको हुनुपर्ने सुझाव खाँणले दिए । बाह्रय सामाग्री खरिद गरेर राष्ट्रवादी नहुने बताउदै नगर प्रमुख खाँणले स्वदेशमै उत्पादन र स्वदेशमै रोजगारको अवस्था सिर्जना गर्न सरकारसँग माग गरे । मुलुकमै उत्पादन गर्ने उद्यमी राष्ट्रवादी हुने संज्ञा दिदै नगर प्रमुख खाँणले भारत र चीनलाई गाली गरेर राष्ट्रवादी नहुने जिकिर गरे । मुलुकको आर्थिक आयु बढाउन स्वदेशमै उत्पादनको खोजी हुनुपर्ने सुझाव खाँणको थियो ।

वालिङ उद्योग वाणिज्य संघका अध्यक्ष शोभाकान्त पौडेल, उपाध्यक्ष गीरमान गुरुङ्, महासचिव धु्रवविक्रम खाँण लगायतका व्यवसायी नेताहरुले सबै व्यवसायीलाई कर तिर्ने प्रणालीका बारेमा बेला बेलामा छलफल हुनुपर्ने बताएका थिए । सहजै तिर्दै आएका व्यवसायीलाई एकै चोटी झन्झटिलो व्यवस्था लागु गर्दा व्यवसायी सशंकित हुन पुगेको उनीहरुले बताएका थिए ।