शिक्षा पत्रकारिता पुरस्कार रौनियारलाई प्रदान

काठमाडौँ । राष्ट्रिय शिक्षा पत्रकारिता पुरस्कार २०७५ रुबी रौनियारलाई प्रदान गरिएको छ । नेपाल पत्रकार महासङ्घ र शिक्षा तथा मानव स्रोत विकास केन्द्रले आज संयुक्त रुपमा आयोजना गरेको ‘शिक्षा पत्रकारिता पुरस्कार २०७५ तथा लैङ्गिक समानता पत्रकारिता पुरस्कार’ वितरण समारोहमा शिक्षा, विज्ञान तथा प्रविधिमन्त्री गिरिराजमणि पोखरेलले नागरिक दैनिकमा कार्यरत रौनियारलाई सो पुरस्कार प्रदान गरे । पुरस्कारको राशि रु ५१ हजार रहेको छ ।

कार्यक्रममा सात प्रदेश र उपत्यकालाई एक प्रदेश मानी आठ प्रदेशबाट एक/एक जनालाई प्रदान गरिने रु २० हजार राशिको प्रादेशिक शिक्षा पत्रकारिता पुरस्कार–२०७५ प्रदान गरिएको थियो । प्रदेश नं १ बाट सुजन तिम्सिना, प्रदेश नं २ बाट सन्तोष सिंह, प्रदेश नं ३ बाट सरिता श्रेष्ठ, गण्डकी प्रदेशबाट कमल खत्री, प्रदेश ५ बाट प्रेमनारायण आचार्य, कर्णाली प्रदेशबाट गोविन्द केसी, सुदूरपश्चिम प्रदेशबाट मोहन विष्ट र उपत्यकाबाट लक्ष्मी पौडेललाई प्रदान गरिएको थियो ।

यसैगरी सात प्रदेश र उपत्यकालाई एक प्रदेश आठ प्रदेशबाट दुई÷दुई जनालाई प्रदान गरिने रु १५ हजार राशिको प्रादेशिक शिक्षा पत्रकारिता समेत प्रदान गरिएको थियो । प्रदेश नं १ बाट रोहित राई र सुशीला पाठक, प्रदेश नं २ बाट बृजलालप्रसाद पासवान र सुनिल ठाकुर, प्रदेश नं ३ बाट शरद अधिकारी र सविता श्रेष्ठ, गण्डकी प्रदेशबाट रोशन तिवारी र शान्ता कमली, प्रदेश नं ५ बाट विकास बन्जाडे र भगवती पाण्डे, कर्णाली प्रदेशबाट विष्णुप्रसाद न्यौपाने र हरि गौतम , सुदूरपश्चिम प्रदेशबाट शैलेन्द्र रोकाय र भूमिराज जोशी तथा उपत्यकाबाट राजन रुचाल र प्रशान्त वलीलाई पुरस्कृत गरिएको थियो ।

त्यसैगरी संस्थागतको एफएमतर्फ रु २० हजार राशिको शिक्षा पत्रकारिता पुरस्कार प्रदेश नं १ बाट तमोर एफएम (ताप्लेजुङ), प्रदेश नं २ बाट रेडियो अपन मिथिला (महोत्तरी), प्रदेश नं ३ बाट रेडियो सन्देश (मकवानपुर), गण्डकी प्रदेशबाट ह्याप्पी एफएम (नवलपुर), प्रदेश नं ५ बाट रेडियो मदनपोखरा (पाल्पा), कर्णाली प्रदेशबाट रेडियो शारदा (सल्यान), सुदूरपश्चिमबाट रेडियो जनप्रिय (अछाम) र उपत्यकाबाट क्यापिटल एफएम (काठमाडौँ)लाई प्रदान गरिएको थियो ।

संस्थागततर्फ छापाबाट शिक्षालय मासिक (ललितपुर), अनलाइनबाट सेतोपाटी डटकम र टेलिभिजनबाट जनता टिभीलाई समेत रु २५ हजार राशिको शिक्षा पत्रकारिता पुरस्कार २०७५ प्रदान गरिएको थियो । महासङ्घले हरेक वर्ष पुरस्कार प्रदान गर्दै आइरहेको छ ।

सोही अवसरमा महासङ्घ र मदरल्याण्ड नेपालको सहकार्यमा प्रदान गर्दै आएको लैङ्गिक समानता पत्रकारिता’ पुरस्कार सुजीतकुमार झा, जनकपुर (एभिन्युज टिभी), तिलसरा विक, हुम्ला (कर्णाली एफएम) र भवानी भट्ट महेन्द्रनगर (कान्तिपुर दैनिक) लाई प्रदान गरिएको थियो ।

रु ४० हजार राशि रहेको उक्त पुरस्कार लैङ्गिक समानता हासिल गर्न समाजलाई अभिप्रेरणा गर्ने, समतामूलक समाज निर्माणमा भूमिका खेल्दै पैरवीयुक्त, खोजमूलक र प्रभावशाली समाचार/आलेख प्रकाशन/प्रसारण गरेबापत प्रदान गरिएको थियो ।