पर्यटन मन्त्रीमा योगेश भट्टराई

काठमाडौं । लामो अन्योल र विवादपछि अन्ततः प्रधानमन्त्री के पी शर्मा ओलीले स्थायी कमिटी सदस्य योगेश भट्टराईलाई मन्त्रिमण्डलमा भित्र्याएका छन् । धेरैले अनुमान गरे झैं भट्टराईलाई पर्यटन तथा नागरिक उड्डयन मन्त्रालयको जिम्मेवारी दिइएको छ । गत आम निर्वाचनमा ताप्लेजुंगबाट निर्वाचित भट्टराईलाई ओलीले सुरु मै आफ्नो मन्त्रिमण्डलमा समावेश गराउने आम विश्वास थियो ।

तर खेमा परिवर्तन गर्न नमानेकाले ओली पछि हटेका थिए । योगेश ओलीका कट्टर आलोचक मध्येका हुन् । उनले कतिपय अनौपचारिक छलफलमा ओली सरकार सिनो झैं गन्हाइसकेकाले यो क्याबिनेटमा नबस्ने टिप्पणी गर्ने गरेका थिए । तर आज विहान ओलीले योगेशलाई बालुवाटार बोलाई आफ्नो योजना सुनाए । त्यसमा योगेशले सहमति जनाए । वालुवाटार स्रोतका अनुसार ओलीसँगको भेटमा योगेशले इमान्दारीपूर्वक सहयोग गर्ने वचन दिएका छन् । सधैं विवादमा पर्ने पर्यटन तथा नागरिक मन्त्रालयमा योगेशको आगमनले नयाँ विवाद आउन सक्छ ।

सन् २०२० लाई नेपाल भ्रमण वर्षका रुपमा सरकारले मनाउने योजना तय गरेको छ । योगेशको क्याबिनेट प्रबेशले पूर्व एमालेको माधव नेपाल समूह झस्किएको छ । योगेशले नेपाल समूहसँग सल्लाह नै नगरी स्वीकृति जनाएको भन्दै असन्तुष्ट बनेको छ । यसरी हेर्दा प्रधानमन्त्री ओली योगेशलाई आफूतिर तान्न सफल हुने संकेत मिलेको छ ।

गत फागुनमा भएको हेलिकोप्टर दुर्घटनामा परेर तत्कालीन संस्कृति, पर्यटन तथा नागरिक उड्डयन मन्त्री रवीन्द्र अधिकारीको निधन भएपछि उक्त मन्त्रालय मन्त्रीविहीन थियो ।