पर्यटन मन्त्रीमा योगेश भट्टराईको शपथ ग्रहण

काठमाडौं । तत्कालिन पर्यटन मन्त्री रवीन्द्र अधिकारीको गत फागुन १५ गते भएको हेलिकोप्टर दुर्घटनामा मृत्यु भएपछि खाली रहेकाे संस्कृति पर्यटन तथा नागरिक उड्ययन मन्त्रीको पदमा नेकपा सांसद योगेश भट्टराईले शपथ लिएका छन्। भट्टराईलाई शीतल निवासमा राष्ट्रपति विद्यादेवी भण्डारीले पद तथा गोपनियताको शपथ दिलाएकी छन् ।

मन्त्री भट्टराईको शपथग्रहण समारोहमा उपराष्ट्रपति नन्दबहादुर पुन, प्रधानमन्त्री केपी शर्मा ओली, सभामुख कृष्णबहादुर महरा, राष्ट्रिय सभाका अध्यक्ष गणेश तिमल्सिना लगायतका संवैधानिक निकायका प्रमुखको समेत उपस्थिती रहेको छ । अनेरास्ववियूकाे अध्यक्षबाट राजनीतिमा प्रवेश गर्दै ताप्लेजुङ जिल्लाबाट सांसद पदमा निर्वाचित योगेश भट्टराई तत्कालिन एमालेको सचिव र प्रचार विभाग प्रमुख भएर काम गरिसकेका छन् भने उनी लोकप्रिय युवा नेतामा समेत पर्छन् ।

तत्कालीन पर्यटन मन्त्री रवीन्द्र अधिकारीको मृत्यु भएपछि मन्त्रालयको जिम्मेवारी प्रधानमन्त्री स्वयंले सम्हाल्दै आएका थिए । सरकारले सन् २०२० लाई पर्यटन बर्ष मनाउने घोषणा गरेको र लामो समय मन्त्रीबिहिन रहनाले धेरै काम हुन नसकेको अबस्थामा मन्त्री हुन लागेका योगेश भट्टराईका लागि यो पद अवसरसँगै ठूलै चुनौति पनि छ ।