अधिकारको सम्मान गर : नेपाल पत्रकार महासङ

काठमाडौं । नेपाल पत्रकार महासङले पत्रकारको पेशा तथा जनताको सुसूचित हुने अधिकारको सम्मान गर्न सम्बन्धित पक्षसँग माग गरेको छ । महासङका महासचिव रमेश विष्टले एक विज्ञप्ति जारी गर्दै शुक्लागण्डकी नगरपालिका तनहुँकी उपप्रमुख सविता रसाइलीले पत्रकार सम्मेलनमार्फत पत्रकारमाथि गरेको दुर्व्यवहारको घटनाप्रति ध्यानाकर्षण भएकाे जनाउँदै पत्रकारको पेशा तथा जनताको सुसूचित हुने अधिकारको सम्मान गर्न आग्रह गरेका हुन् ।

उनका अनुसार गत साउन १० गते उपप्रमुख रसाइलीले नगरपालिकाको सभाकक्षमा ढुङ्गागिटीका बारेमा पत्रकार सम्मेलन गर्ने भन्दै पत्रकारमाथि अभद्र तरिकाले उत्रिनुका साथै पत्रकारलाई लाञ्छना लगाउँदै दुर्व्यवहार गरेकी थिइन् ।

यसैगरी महासङ्घले तेह्रथुमबाट प्रकाशित हाम्रो सवाल डटकमका सम्पादक अमृत बाँस्तोलालाई उक्त अनलाइनमा प्रकाशित समाचारको विषयलाई लिएर प्राथमिक स्वास्थ्य केन्द्र, सङ्क्रान्ति तेह्रथुमका स्वास्थ्यकर्मी सन्तोषप्रसाद साहले साउन ३ गते फोनमार्फत उक्त समाचार हटाउन दबाब दिँदै धम्की दिएकोप्रति आपत्ति जनाएको छ । समाचार प्रकाशन भएको विषयमा असहमति भए उजूरी गर्ने निकाय हुँदाहुँदै पत्रकारमाथि दुर्व्यवहार तथा धम्की दिनु प्रेस स्वतन्त्रतामाथिको हस्तक्षेप भएको महासङकाे ठहर छ । महासङले घटनाको सत्यतथ्य छानविन गरी घटनाका दोषीमाथि कारवाही गर्न माग गरेको छ ।