सैनिक परेड स्थानमा शक्तिशाली विष्फोट, ३२ जनाको मृत्यु

काठमाडौं । यमनको राजधानी आदेनमा आयोजित सैनिक परेडमा आक्रमण हुँदा ३२ जना सैनिकको मृत्यु भएको छ ।

आदेन शहरस्थित बुराइका जिल्लाको अल जला सैनिक ब्यारेकमा आयोजना गरिएको परेडमा अचानक विष्फोट भएको र उक्त आक्रमणमा परी दर्जनौं सैनिक घाइते भएको यमनी अधिकारीले जनाएका छन् । मारिनेमा यमनी सेनाका वरिष्ठ सैनिक अधिकारीसमेत रहेको बताइएको छ ।

सो आक्रमणको जिम्मा भने यमनमा सक्रिय विद्रोही समूह हुथीले लिएको छ । राजधानी सानामा कब्जा जमाएको हुथी विद्रोहीनिकट अल मशिरा टेलिभिजनका अनुसार मध्यम दुरीको ब्यालेष्टिक क्षेप्यास्त्र एवं चालकरहित ड्रोनबाट आक्रमण गरिएको हुथी विद्रोहीको दावी छ ।

उक्त सैनिक परेड यमनको ताइज र दालेआ शहरमा आक्रमणका लागि तयारी गर्न आयोजना गरिएको हुदा आक्रमण गरेको हुथी विद्रोहीको दावी छ ।