सहकारीहरुले अब १६% भन्दा धेरै व्याजदरमा ऋण लगानी गर्न नपाउने

काठमाडौं। सहकारीहरुले अबदेखि १६ प्रतिशतभन्दा माथी कर्जा प्रवाह गर्न नपाउने भएका छन्। आइतबारदेखि मुलुकभरका सहकारीहरुलाई लागु हुने गरी सन्दर्भ व्याजदर लागु गरिएको सहकारी विभागका रजिष्ट्रार डा. टोकराज पाण्डेले जानकारी दिएका छन्।

सहकारीहरुले पहिले पहिले जतिसुकै व्याजदरमा कर्जा प्रवाह गरेको भए पनि आइतबारदेखि सम्पुर्ण कर्जाको व्याजदर १६ प्रतिशत भन्दा धेरै हुन नहुने व्यवस्था गरिएको हो। कतिपय बैंकहरुले निक्षेप नै १६ प्रतिशत भन्दा धेरै दिइरहेको सन्दर्भमा यस्तो नियमले ति बैंकलाई असहज हुने देखिएको छ। कुनै पनि सहकारीले १६ प्रतिशत भन्दा माथि कर्जा प्रवाह गरेको पाइएमा विभागले कारबाही गर्ने पाण्डेले जानकारी दिए।

सहकारीले सन्दर्भ व्याजदर निर्धारण भएसँगै बचतमा भारित औसत व्याजदरभन्दा सामान्यतया बढी, ऋणमा भारित औसत व्याजदरभन्दा सामान्यतया घटी र बचत र ऋणको व्याजदरको अन्तर ६ प्रतिशत भन्दा घटी हुनुपर्ने व्यवस्था गरेको हो।   सहकारी विभागले सन्दर्भ व्याजदर तोक्दा बचत तथा ऋणको कारोबार गर्ने केन्द्रीय विषयगत संघमा आवद्ध संस्था र संघहरुको औसत व्याजदरलाई लिएको बताइएको छ ।

सहकारी बैंकहरुको औसत व्याजदर, बाणिज्य बैंकहरुको औसत व्याजदर, नेपाल राष्ट्र बैंकले अध्ययन गरेका प्रतिवेदनहरु, राष्ट्रिय सहकारी महासंघले दिएका सुझावका आधारमा यस्तो दर निर्धाण गरेको हो।

सहकारी ऐनको दफा ५१ र सहकारी नियमावली २०७५ को व्यवस्थालाई टेकेर विभागले पहिलो पटक व्याजरको सिलिङ तोकेको हो।