सप्तकोशीमा पानीको बहाव उच्च भएपछि ५६ वटै ढोका खोलियो

काठमाडौं । लगातारको वर्षाले पूर्वी पहाडमा बाढी आउँदा सप्तकोशीमा पानीको बहाव उच्च भएपछि कोशी ब्यारेजका सबै ढोका खोलिएको छ ।

सप्तकोशीमा पानीको बहाव बढेपछि कोशी ब्यारेजका ५६ वटै ढोका आइतबार आज विहान खोलिएको हो । ढोका खोलेसँगै कोशी नदीमा पानीको बहाव कम भएको छ ।

९ लाख क्युसेक पानी बहने क्षमता रहेको ब्यारेजमा अहिले २ लाख ९० हजार क्युसेक पानी बगिरहेको बताइएको छ । शनिबार ३ लाख १८ हजार ६ सय ५० क्युसेक पानी बगिरहेको थियो ।

यो वर्ष सप्तकोशीमा २४ हजार क्युसेक पानीबाट अहिले बढ्दै सो क्षमतामा बगिरहेको छ । एक दशकअघि ब्यारेजदेखि माथि सिरान पश्चिम कुशहामा बाँध फुटेको थियो ।

बाँध फुट्दा नेपाल र भारतमा थुप्रै जनधनको क्षति भएकाले अहिले कोशी ब्यारेज र बाँधलाई सुरक्षित राख्न प्राविधिकहरुले विशेष सतर्कता अपनाएका छन् ।