चेम्बरले माग्यो विद्यार्थीका लागि छात्रवृत्ति आवेदन

काठमाडौं । नेपाल चेम्बर अफ कमर्सले प्रत्येक प्रदेशबाट एक/एक जना विद्यार्थीका लागि छात्रवृत्तिको आवेदन आह्वान गरेको छ । छात्रवृत्ति योजनाको उद्देश्य आर्थिक अवस्था कमजोर भई उच्च शिक्षा हासिल गर्नबाट बञ्चित भएका मेहनति तथा जेहेन्दार छात्रा विद्यार्थीलाई निशुल्क पढ्ने वातावरण प्रदान गरि उनीहरुलाई रोजगारमुखी शिक्षा प्रदान गर्नु रहेको बताइएको छ ।

यो छात्रवृत्ति प्राप्त गर्ने विद्यार्थीले एपीयूसँग आबद्ध लर्डबुद्ध क्याम्पस मैतिदेवीमा ३ वर्षे बीएमा बिजनेस म्यानेजमेन्ट (BBM-E) स्नातक तह पढ्न पाउनेछन् । +२ पास वा सो सरह अध्ययन गरेका विद्यार्थीले यो छात्रवृत्तिको लागि आवेदन दिन सक्नेछन् ।

यस योजनाबाट महिला विद्यार्थीहरुले लाभ लिन सक्नेछन् किनकि यस योजना अन्तर्गतको प्रमुख छात्रवृत्ति छात्राहरुको लागि छुट्याइएको छ । यो विषय अध्ययन गर्न चाहने छात्राले छात्रवृत्तिमा परेमा ६ लाख ६५ हजार रुपैयाँ बराबरको अध्ययन शुल्कको छात्रवृत्ति प्रदान गरिने भएको छ । छात्रवृत्ति सम्बन्धी विस्तृत विवरण चेम्बरको वेबसाइट https://www.nepalchamber.org/ र लर्डबुद्धको http://www.lbef.org/ मा प्रकाशित गरिएको छ ।

इच्छुक महिला विद्यार्थीले चेम्बरको जिल्ला चेम्बर वा सिधै अनलाइनमार्फत आफ्नो फर्म भर्न सक्ने जनाइएको छ ।