नेपाली बजारमा सुनको भाउ इतिहाँसकै महङ्गो

काठमाडौं । यतिबेला नेपाली बजारमा सुनको भाउ इतिहाँसकै महङ्गो भएको छ । सोमबार सुन इतिहाँसमै पहिलोपटक एकैचोटी १५ सय रुपैयाँले बढेको नेपाल सुनचाँदी व्यवसायी महासंघले जनाएको छ ।

साताको पहिलो दिन आइतबार तोलाको ६६ हजार ३ सयमा कारोबार भएको सुनको भाउ सोमाबार एक्कासी ६७ हजार ८ सय रुपैयाँ पुग्यो । तेजाबी सुन पनि प्रतितोला ६७ हजार ५ सयमा कारोबार भईरहेको छ ।

अमेरिकासँग इरान र उत्तर कोरियाको आणविक विवादका कारण अन्तराष्ट्रिय बजारमा केही दिनदेखि महङ्गिएको सुनको भाउ नेपाली बजारमा पनि आकाशिएको छ । यसको पछिल्लो कारण भने अमेरिका र चीनबीचको व्यापार युद्ध भएको अनुमान गर्न सकिन्छ ।

काठमाडौंको न्यून रोडमा सुंचालित गण्डकी सुनचाँदी पसलका सुवास रसाईली भन्छन्, सुनको भाउ प्रतितोला ७० हजार पुग्न सक्छ । ‘एकैदिन १५ सयले बढ्यो, यो क्रम अझै केही दिन रहन्छ’ उनले भने, ‘सुन यसपाली तोलाको ७० हजार नाघ्न सक्छ ।’

अन्तराष्ट्रिय बजारमा शक्ति राष्ट्रहरुबीच व्यापार युद्ध चुलिएका कारण सुनमा लगानी बढेको छ । व्यापारमा देखिएको असमझदारीका कारण सेयरको मूल्य घट्ने भएकाले अन्तराष्ट्रिय लगानीकर्ताले सुरक्षाका लागि सुनमा लगानी गर्ने गरेका छन् ।

जर्मन सरकारले जारी गरेको ऋणपत्रका कारण पनि सुनमा लगानी बढेको अन्तराष्ट्रिय सञ्चारमाध्यमले जनाएका छन् ।