कोटेश्वर–जडिबुटी खण्डमा तत्काल सुरुङ मार्ग बनाउन महेश बस्नेतको माग

काठमाडौं । सत्तारुढ दल नेपाल कम्युनिष्ट पार्टी (नेकपा)का प्रभावशाली युवा नेता, पूर्वमन्त्री तथा प्रतिनिधिसभाका सांसद महेश बस्नेतले उपत्यकाबासीले ठूलो सवारी जामको समस्या भाेगिरहनु परेको कोटेश्वर–जडिबुटी खण्डमा तत्काल सुरुङ मार्गको निर्माण कार्य अघि बढाउन सम्बन्धित मन्त्री तथा मन्त्रालय समक्ष माग गरेका छन् ।

प्रतिनिधिसभाको आजको शुन्य समयमा बोल्दै सांसद बस्नेतले कोटेश्वको सुरुङ मार्ग तथा सूर्यविनायकदेखि धुलिखेलसम्मको ६ लेनको सडक विस्तारको कार्य तत्काल शुरु गर्न माग गरेका हुन् । कोटेश्वर, बनेपा, सिन्धुली नेपालकै दोस्रो नाका रहेको बताउँदै उनले सूर्यविनायक – धुलिखेल तथा कोटेश्वरमा सुरुङ मार्ग निर्माण गरी उपत्यकामा बसोवास गर्ने लाखौं मानिसलाई सास्तीको रुपमा रहेको सवारी जामको अन्त्य गर्नुपर्नेमा जोड दिए ।

उनले पूर्वी नेपालतर्फ जाने दैनिक करिब २० हजारभन्दा वढी सवारी साधन गुड्ने गरेकाले वर्तमान समयमा सुरुङ मार्ग तथा सूर्यविनायक – धुलिखेलको सडक ६ लेनको बनाउनुको कुनै विकल्प नभएको समेत बताए ।

सूर्यविनायकदेखि धुलिखेलसम्मको सडकलाई ६ लेन तथा कोटेश्वरमा सुरुङ मार्ग बनाउने भन्ने कुरा नेपाल सरकारले अघिल्लो वर्षबाट नै डीपीआरको कुरा बजेट तथा नीति तथा कार्यक्रममा ल्याएको तर उक्त प्रकृया ढिलाई भइरहेको बताउँदै सांसद बस्नेतले भने, ‘ भौतिक यातायात तथा पूर्वाधार मन्त्रालयले यो बारेमा उचित चासो लिन नसकेको जस्तो अनुभति भएकोले सम्बन्धित मन्त्री तथा मन्त्रालयले उचित पहल कदमी लिने र यसलाई महत्वका साथ अघि बढाउन आग्रह गर्दछु ।’

कोटेश्वर जडिवुटीको जाम नेपालकै अत्याधिक जाम हुने मध्येमा रहेको बताउँदै उनले जापान सरकारले सो सन्दर्भमा सहयोग गर्ने भन्ने कुरा धेरै अघिदेखि नै प्रक्रिया बढेको जानकारी गराउँदै भने, ‘सम्बन्धित मन्त्री तथा मन्त्रालयले विशेष चासो नदिदाँ सुरुङ मार्ग तथा उक्त सडक निर्माण प्रकृयामा ढिलाई भएको छ । जिम्मेवार निकायले समयमा नै विशेष महत्व दिई उक्त दुवैको निर्माण कार्य थाल्नुपर्छ ।’