चिनियाँ सामानको विदेशी व्यापार ४.२ प्रतिशतले वृद्धि

एजेन्सी । चिनियाँ सामानको विदेशी व्यापार सन् २०१८ को पहिलो सात महिनाको तुलनामा सन् २०१९ को सोही समयमा ४.२ प्रतिशतले वृद्धि भएको छ ।

चीनको भन्सार कार्यालयको बिहीबार सार्वजनिक तथ्याङ्कअनुसार अघिल्लो वर्षको पहिलो सात महिनाको तुलनामा यसवर्ष वैदेशिक व्यापारबाट १७४ खर्ब १० अर्ब चिनियाँ युआन (२० खर्ब ४९ करोड अमेरिकी डलर) थप नाफा भएको छ ।

चीन–अमेरिका व्यापार विवादका कारण चिनियाँ अर्थतन्त्रमा व्यापक प्रभाव पर्नसक्ने कतिपय अनुमानहरूलाई यो तथ्याङ्कले गलत सावित गरिदिएको छ ।

चिनियाँ भन्सारअन्तर्गत तथ्याङ्क विश्लेषण विभागका प्रमुख ली ख्वै वनका अनुसार, “सोही अवधिमा चीनको निर्यातमा गत वर्षको तुलनामा ६.७ प्रतिशतले वृद्धि हुँदा ९४ खर्ब ८० अर्ब युआनको कारोबार भएको छ भने आयात १.३ प्रतिशतले बढेको छ । बढेको आयात प्रतिशतअनुसार आयाततर्फ चीनको ७९ खर्ब ३० अर्ब युआनको कारोबार भएको छ । ”

विभागका प्रमुख लीले भने , “यो अवधिमा चीनको अतिरिक्त व्यापारको मात्रा गत वर्षको सोही समयको तुलनामा ४७.४ प्रतिशतले बढेको देखिएको छ । यसबाट चीनले १५ खर्ब ५० करोड युआन बढी आम्दानी गरेको छ ।”

“चालू वर्षका अघिल्ला ७ महिनामा चीनको सामान्य व्यापारिक आयात–निर्यातको कूल मात्रा १०४ खर्ब पुगेकाले गत वर्षको सोही अवधिको तुलनामा ५.७ प्रतिशतले वृद्धि भएको छ । त्यो सङ्ख्याले कूल वैदेशिक व्यापारिक मात्राको ५९.८ प्रतिशत स्थान ओगटेको छ । यो अघिल्लो वर्षको तुलनामा शून्य दशमलव आठ प्रतिशत अङ्कले बढी हो ।”

यो समयमा चीनको सबैभन्दा ठूलो व्यापार साझेदार युरोपेली सङ्घ (ईयू) बनेको छ । ईयूसँग द्विपक्षीय व्यापारको आयतनमा १०.८ प्रतिशत पुगेको छ । एक वर्ष पहिले ईयूसँगको द्विपक्षीय व्यापारको आयतनमा कूल २७ खर्ब २० अर्ब युआन पुगेको छ ।

ईयूलाई पछ्याउँदै चीनसँगको दोस्रो ठूलो साझेदार दक्षिणपूर्वी एशियाली मुलुकहरूको सङ्गठन (आसियन) बनेको छ । चीनले आसियन मुलुकहरूसँगको कारोबारलाई ११.३ प्रतिशतले बढाएर दुईपक्षीय कारोबार रकमलाई २३ खर्ब ५० अर्ब युआन पु¥याएको छ भने अमेरिका तेस्रो स्थानमा रहेको छ ।

यो वर्ष अमेरिकासँगको विवादका कारण चीन–अमेरिकाबीचको व्यापार आयतनमा भने ८.१ प्रतिशतले कमी आएको राजश्व कार्यालयले दिएको तथ्याङ्कमा उल्लेख छ । यसबाट चीनले अमेरिकासँगको व्यापार कारोबारमा २१ खर्बले कमी देखिएको छ ।

चीनको व्यापार राष्ट्रपति सी चिनफिङको महत्वाकाङ्क्षी रेशम मार्ग परियोजना अर्थात् एक पेटी एक सडक (ओबीओआर) अन्तर्गतका मुलुकहरूसँगको कारोबार रकम ५० खर्ब ३० अर्ब चिनियाँ युआन पुगेको छ । यो गतवर्षको पहिलो सात महिनाको तुलनामा १०.२ प्रतिशत बढी हो । यो रकम कूल व्यापार रकमको २८.९ प्रतिशत हो ।

यसैगरी यो अवधिमा चीनको निजी क्षेत्रको कारोबार रकम ११.८ प्रतिशतले बढेको र यसअन्तर्गत ७३ खर्ब १० अर्ब युआन कारोबार भएको छ भने यो रकम चीनको सम्पूर्ण व्यापार कारोबार रकमको ४२ प्रतिशत हो ।