एलआईसी नेपालको साधारण सभाले पास गर्यो ७० प्रतिशतको लाभांश, बीमा शुल्क आर्जनमा ४६ प्रतिशतको बृद्धि

काठमाडौं । लाइफ इन्स्योरेन्स कर्पोरेशन नेपाल (एलआईसी नेपाल) लिमिटेडको १७ औं वार्षिक साधारण सभा आज नेपाल पुलिस क्लबको सभाहल, प्रदर्शनीमार्ग, काठमाडाैंमा सम्पन्न भएको छ ।

साधारण सभाले आर्थिक बर्ष २०७४/०७५ को वासलात र आयव्यय विवरणलाई अनुमोदन गर्दै कम्पनीको मुनाफाबाट शेयरधनीहरुलाई चुक्ता पूँजीको ७० प्रतिशत लाभांश पारित गरेको छ जस अन्तर्गत ३४.४६ % वोनस शेयर र ३५.५४ प्रतिशत नगद लाभांश रहेको छन् । आ.ब. २०७४/०७५ मा कम्पनीले एक लाख ३३ हजार ३०९ नयाँ बीमालेखहरु बिक्री गरी प्रथम बीमा शुल्क आम्दानी बापत रु. २ अर्ब ८८ करोड ८९ लाख संकलन गर्न सफल भएको थियो ।

कम्पनीले २०७५ आषाढ मसान्तसम्ममा कूल चालु बीमालेखको संख्या ७ लाख ३४ हजार ६०८ पुर्याएको छ जसबाट कूल जीवन बीमा कोषमा रु. ४२ अर्ब २३ करोड ३४ लाख संकलन गर्न सफल भएको छ । आ.ब. २०७४/०७५ मा कम्पनीको कूल जीवन बीमा कोषमा २५.८५ प्रतिशत, प्रथम बीमाशूल्क आर्जनमा ९.७० प्रतिशत, लगानीतर्फ २१.७६ प्रतिशत र लगानीबाट प्राप्त आम्दानीमा ५५.६७ प्रतिशतको बृद्धिदर रहेको कम्पनी सचिव विनोदकुमार भुजेलले जानकारी दिएका छन् ।

साधारण सभामा कम्पनीका अध्यक्ष एम.आर. कुमारले सवै शेयरधनीहरुलाई समय र सुझावका लागि धन्यवाद दिदै एलआईसी नेपालको १८ औं (आ.ब. २०७५/७६) वार्षिक साधारण सभा पनि यथाशक्य चाँडो सम्पन्न गरिने बताए । उनले आ.ब. २०७५/०७६ मा पनि कम्पनीले प्रथम बीमाशुल्क आर्जनमा ४६.३६ प्रतिशतको बृद्धिदरका साथ कूल बीमाशुल्क आर्जन रु. १३ अर्ब ४१ करोड १७ लाख जम्मा गर्न सफल भएको समेत जानकारी दिएका थिए ।

जीवन बीमाको माध्यमबाट देशकोे आर्थिक एवं सामाजिक विकासमा सहभागी हुन पाएकोमा खुशी व्यक्त गर्दै अध्यक्ष कुमारले यसका बीमकलाई सदैव एक उदाहरणीय जीवन बीमा कम्पनी कायम राखिरहने प्रतिबद्धता जनाए ।

सभामा संचालक समितिका अन्य संचालकहरु अशोक अग्रवाल, कुमार केशर विष्ट, भि.के. कुक्रेजा र एलपी दास उपस्थित लगायत हजारौं सर्वसाधारण शेयरधनीको सहभागिता थियो ।