यमनमा साउदी हवाई आक्रमण

काठमाडौं । साउदी अरबले यमनमा सक्रिय पृथकतावादी समूह साउदर्न ट्रान्जिसनल कमिटी एसटीसीका लडाकुलाई लक्षित गरी हवाई आक्रमण गरेको छ ।

अन्तर्राष्ट्रिय मान्यताप्राप्त यमनी सरकारको राजधानी शहर आदेनमा सरकारी सेनाविरुद्ध लडिरहेको एसटिसीका लडाकुलाई लक्षित गरी हवाई आक्रमण गरिएको साउदी अधिकारीले जनाएका छन् । हवाई आक्रमणबाट भएको क्षतिको विवरण भने आउन बाँकी रहेको बताइएको छ ।

साउदी अरबले एसटिसीलाई सरकारसँग वार्ता गर्न आह्वान गरेको छ । सरकारसँग वार्तामा नबसे लडाकुलाई लक्षित गरी थप आक्रमण गर्ने साउदीको चेतावनी छ । साउदी हवाई आक्रमणपछि यमनी सेना तथा सरकारी कार्यालयलाई लक्षित गर्न गएका एसटिसीका लडाकुहरु फिर्ता भएका छन् ।

हाल यमनको राजधानीमा हुथी बिद्रोहीले कब्जा गरेका कारण यमनको अन्तर्राष्ट्रिय मान्यताप्राप्त सरकारले आदेनलाई अस्थायी राजधानी बनाएको छ । दक्षिणी यमनलाई पृथक राज्य बनाउनका लागि स्थापित एसटिसीले आदेनका सरकारी कार्यालयहरुमा कब्जा जमाएर बसिरहेको बताइएको छ ।

एसटीसीलाई भने साउदी गठबन्धनमै सामेल युएईले आर्थिक तथा सैनिक सहयोग गरिरहेको यमन सरकारको भनाइ छ । अर्कोतर्फ साउदी अरबले भने राष्ट्रपति अब्दरब्बु मन्सुर हादीको समर्थनमा हुथी विद्रोही तथा अन्य लडाकु समूहलाई लक्षित गरी हवाई आक्रमण गर्दै आएको छ ।