चरणबद्ध आन्दोलनबाटै लोकसेवा विज्ञापनको खारेजी

काठमाडौं । लोकसेवा आयोगले निकालेको विज्ञापनप्रति असन्तृष्ट जनाउँदै दलित विद्यार्थीहरुले चरणबद्ध आन्दोलनबाटै विज्ञापनको खारेजी गर्ने बताएका छन् ।

सबै राजनीतिक दलसँग आबद्ध विद्यार्थी नेताहरुले दलित आन्दोलनका अगुवालाई सहित आन्दोलनमा उपस्थिति गराउने र आन्दोलनबाट विज्ञापनको खारेजी गराउने जिकिर गरेका हुन् ।

शनिबार दलित विकास समितिको सभाहलमा आन्दोलनका अगुवासहित दलित विद्यार्थीहरुले आन्दोलनको मागचित्र बनाउनुको साथै आजै ४ बजे माइतीघरमा विरोधसभासमेत गर्ने उनीहरुले बताएका छन् ।

नेपालको संविधान २०७२ को धारा ३८ ९४०, ४० ९१०, ४२ ९१० र धारा २८५ ले प्रत्याभूत गरेको महिला, दलित, मधेसी, थारु, जनजाति, मुस्लिम, पिछडिएका वर्ग, क्षेत्रसमेतलाई राज्यको निकायमा समानुपातिक समावेशी हुन पाउने अधिकारलाई लोकसेवा आयोगको पछिल्लो विज्ञापनले पूर्णरूपमा बेवास्ता गरी लत्याएको उनीहरूले बताएका छन् ।

संविधानमा उल्लेख गरेको समावेशी, समानुपातिक प्रणालीलाई बेवास्ता गर्दै न्यूनतम मापदण्ड पनि अवलम्बन नगरी पदपूर्ति गर्न खोजिएको भन्दै उक्त विज्ञापन खारेज नभएसम्म सशक्त आन्दोलन गर्ने संयुक्त दलित विद्यार्थी सङ्घर्ष समिति नेपालको संयोजक मदन भूलले बताए।

लोकसेवा आयोगले जेठ १५ गते निकालेको निजामती कर्मचारीको रिक्त पदपूर्तिका लागि कर्मचारी भर्ना गर्ने विज्ञापनमा दलित समुदायलाई बेवास्ता गरी समानुपातिक तथा समावेशी व्यवस्थाले दलित आन्दोलनको उपलब्धिसमेत गुमेको हुँदा सबै एक भएर आन्दोलनमा उत्रिनुपर्ने नेविसङ्घ नेता पवन नेपालीले बताए ।

सबै राजनीतिक दलसँग आवद्ध दलित विद्यार्थी नेताले एकजुट भएर आन्दोलनमाबाटै संविधानले दिएको अधिकारलाई लोकसेवा आयोगबाट खोसिएको अधिकारलाई स्थापित गराउने अखिल क्रान्तिकारीका राम नेपालीले बताए ।

लोकसेवा आयोगको यस कार्यको विरुद्ध चरणवद्ध आन्दोलन गर्ने चेतावनीस्वरुप मधेसी विद्यार्थी र दलित विद्यार्थी नेताहरुको संयुक्त प्रयासमा विरोध प्रदर्शन यसअघि पनि गरेका छन् ।