ट्रककाे ठक्करबाट पुल भासिएपछि राजमार्ग अवरुद्ध, खुलाउने प्रयास जारी

२९ साउन, काठमाडौं । पूर्वी नवलपरासी स्थित अरुणखोलामाथिको पुल लच्किएपछि सवारी आवागमन ठप्प भएको छ । आज बिहान पूर्वबाट पश्चिमतर्फ गइरहेको ना ६ ख ४७१ नम्बरको ट्रकले पुललाई ठक्कर दिएपछि पुल भासिएको हो । पुल भासिएपछि ठूला र मालवहाक सवारी आवागमन अवरुद्ध भएको हो ।

ट्रकले बायाँ साइडमा ठक्कर दिँदा पुलको दक्षिणतर्फको भाग डेढ मिटर गहिरो भासिएको इलाका प्रहरी कार्यालय अरुणखोलाले नेपालबहस डटकमलाई जानकारी दिएको छ । पुलबाट आवागमनमा रोकिएपछि सयौं सवारी साधन तथा यात्रु जाममा फसेका छन् । तर साना सवारी साधन भने चलिरहेका छन् ।

अहिले पुलमा रहेको ट्रक हटाएर वैकल्पिक बाटो खुलाउने प्रयास भइरहेको छ । त्यसका लागि सडक डिभिजन कार्यालय र स्थानीय तहसँग समन्वय भइरहेको छ । ट्रक निकाले पनि पुलबाट ठूला सवारीसाधन आवतजावतमा समस्या हुने जिल्ला प्रहरी कार्यालय नवलपरासीपूर्वका प्रहरी निरीक्षक राजेन्द्र अधिकारीले बताए । बिहान पुलमा क्षति पुगेपछि अहिले यात्रुवाहक बससमेत रोकिएका छन् । प्रहरीले पूर्वबाट आउने सवारीलाई यात्रु उतारे पूर्व नै फर्किने र पश्चिमबाट आएका सवारीलाई समेत यात्रु उतारेर पश्चिम नै फर्किने व्यवस्था गरिरहेको छ । प्रहरी निरीक्षक अधिकारीका अनुसार तत्काल पुल मर्मत हुनसक्ने सम्भावना कम भएकाले चितवन प्रहरी र बुटवल प्रहरीलाई खबर गरी वैकल्पिक बाटोको प्रयोग गरी सवारी सञ्चालनका लागि भनिएको छ ।