घरघरमै पुगेर जग्गाको लालपूर्जा वितरण

३० साउन, काठमाडौं । बुटवल उपमहानगरपालिकाले विभिन्न क्षेत्रमा करीब ५०० जनालाई लालपूर्जा वितरण गरेको छ । उपमहानगरपालिकाले साविकको मोतिपुर र सेमलार गाविसका विभिन्न टोलमा गाउँब्लकका घर जग्गाको लालपूर्जा वितरण गरेको हो ।

बुटवल उपमहानगरपालिकाका प्रमुख शिवराज सुवेदीले मोतिपुरका स्थानीय ज्येष्ठ नागरिक जगन्नाथ ढकाल र उनका दुई भाइलाई लालपूर्जा वितरण गर्दै घरघरमै पुगेर पूर्जा वितरण गर्ने कार्यक्रमको शुभारम्भ गरेका हुन् । विसं २०२७ मा पाउनुपर्ने लालपूर्जा अहिलेसम्म नपाएकोले उक्त समस्या समाधानका लागि अहिले प्रक्रिया अगाडि बढाएको प्रमुख सुवेदीले बताए ।

“बल्ल ढुक्क भइयो”, लामो समय शिक्षण पेशा गरेका ज्येष्ठ नागरिक ढकालले जति नै जग्गा भए पनि स्वामित्व पाउन नसक्दा निराशा लाग्ने अवस्थाको अन्त्य भएको बताए । सेमलार, मोतिपुर, रानीगञ्ज, पोखराबारी तथा मनोहरापुर क्षेत्रका वासिन्दालाई लालपूर्जा वितरण गरिएको हो । फिल्डमै पुगेर जग्गाधनीका हातमै लालपूर्जा उपलब्ध गराइएको बुटवल उपमहानगरपालिकाका प्रवक्ता रामप्रसाद रेग्मीले जानकारी दिए । वडा नं १७, १८ र १९ का वडाध्यक्ष सन्तबहादुर राना, हुमनाथ आचार्य र खिमबहादुर खत्रीसहितका जनप्रतिनिधिको रोहवरमा नापी कार्यालयका पदाधिकारीले जग्गाको लगतका बारेमा अध्ययन गरेका छन् ।

लामो समयदेखि जोतभोग गरे पनि स्वामित्व आफूहरुको नहुँदा बहुउपयोगका काम हुन नसकेको भन्दै त्यसक्षेत्रका बासिन्दाले गुनासो गरेका थिए । रुपन्देहीमा मात्रै उक्त समस्याका करीब दुई हजार २०० जति लालपूर्जा तयार भइरहेको र सँगसँगै वितरण पनि भइरहेको नापी कार्यालयका अमिन लक्ष्मण गिरीले जानकारी दिए ।

बुटवलले अव्यवस्थित बसोबासी र सुकुम्बासीका अलगअलग तथ्याङ्क सङ्कलन गरिरहेको छ । अव्यवस्थित बसोबासको पहिलो चरणको तथ्याङ्क सङ्कलनका काम पूरा भइसकेको र तिनको कागजातका बारेमा अध्ययन भइरहेको बुटवल उपमहानगरपालिका उपप्रमुख गुमादेवी आचार्यले जानकारी दिए ।