शिवशक्ति मावि बटेश्वरका ९५ छात्रालाई साईकल

५,भदौ जनकपुरधाम । मुख्यमन्त्री लालबाबु राउतले समाजिक रुपान्तरणको लागि नारी सशक्तिकरण आवश्यक रहेको बताएका छन ।

मुख्यमन्त्री बेटी पढाउ, बेटी बचाउ कार्यक्रम अन्तर्गत धनुषाको बटेश्वर गाउ पालिका स्थित शिवशक्ति नमूना माबि बटेश्वरमा आयोजित साइकल वितरण कार्यक्रममा मुख्यमन्त्री राउतले समग्र विकासको मुल आधार नारी सशक्तिकरण रहेको उल्लेख गरे।

उनले भने ,‘ प्रदेशको समृद्धिको लागि समाजिक रुपान्तरण र समाजिक रुपान्तरणको लागि नारी सशक्तिकरण आवश्यक रहेकाले नै प्रदेश सरकारले बेटी पढाउ बेटी बचाउ कार्यक्रम अन्तर्गत छोरी शिक्षा विमा, साइकल वितरण जस्ता कार्यक्रमहरु अघि सारेको छ । ’

प्रदेश सरकारले छोरीहरुलाई शिक्षित मात्र नभई रोजगारी दिने ग्यारेन्टी समेत गरेको उनको कथन थियो । कार्यक्रममा विशिष्ट अतिथि प्रदेश सभा सदस्य सत्रुधन महतो, समाजवादी पार्टीका नेता महाजन यादव, बटेश्वर गा.पा.का अध्यक्ष डम्बर बहादुर राउत क्षेत्री सहितका वक्ताहरुले कार्यक्रमको प्रशंसा गर्दै सरकारको अभियानमा हातेमालो गर्ने प्रतिबद्धता जनाए ।

उक्त विद्यालयका कक्षा ८मा अध्ययनरत ९५ जना छात्राहरुलाई मुख्यमन्त्री राउतले साइकल हस्तान्तरण गरे ।