भाजपा नेता तथा पूर्व अर्थमन्त्री जेट्लीको निधन

७ भदौ, काठमाडौं । पूर्व अर्थमन्त्री तथा भारतीय जनता पार्टी (बिजेपी)का वरिष्ठ नेता अरुण जेट्लीको शनिबार अपराह्न निधन भएको छ । उनको ६६ वर्षको उमेरमा नयाँ दिल्लीस्थित अखिल भारतीय आयुर्विज्ञान संस्थान (एम्स) मा उपचारकै क्रममा निधन भएको अस्पतालले जारी गरेको विज्ञप्तिमा उल्लेख छ ।

भारतीय प्रधानमन्त्री नरेन्द्र मोदी, गृहमन्त्री अमित शाह र बिजेपीका वरिष्ठ नेताहरु अस्पताल पुगेका थिए । जेट्ली गत अगस्त महिनाको शुरुमा नै एम्समा भर्ना भएका थिए । पूर्व प्रधानमन्त्री अटल बिहारी बाजपयीको सरकारमा नै सन् २००० मा जेट्ली पहिलो पटक मन्त्रिमण्डलमा सहभागी भएका थिए ।

उनले सन् २००९ मा राज्यसभामा विपक्षी दलको नेताको रुपमा जिम्मेवारी सम्हालेका थिए । उनले सन् २०१४ मा अर्थात् मोदी सरकारको पहिलो कार्यकालमा अर्थमन्त्री भएर जिम्मेवारी निभाएका थिए । तर, सन् २०१९ को भारतीय लोकसभाको निर्वाचनमा स्वास्थ्यको कारण देखाउँदै उम्मेदवारी दिन अस्वीकार गरेका थिए । उनको गत वर्ष मे महिनामा मिर्गौला प्रत्यारोपण गरिएको थियो । पछिल्लो समय भाजपाले दुई ठूला नेता गुमाएको छ । अघिल्लो महिनामात्रै पूर्वविदेशमन्त्री सुष्मा स्वराजलाई गुमाएको भाजपाले आज अर्का नेता जट्लीको निधनलाई सहनु परेको छ ।