टीकापुरमा थारुहरुको राष्ट्रिय सम्मेलन सुरु

७ भदौ, टीकापुर । कैलालीको टिकापुरमा थरुहट थारुवान संयुक्त संघर्ष समितिले आयोजना गरेको राष्ट्रिय सम्मेलन शनिबारदेखि सुरु भएको छ । टीकापुर स्थित सिटी हलमा सुरु भएको सम्मेलनका लागि टीकापुर र आसपासको सुरक्षा व्यवस्था कडा पारिएको छ ।

कैलालीका प्रहरी प्रमुख प्रहरी उपरीक्षक सुदिप गिरी अनुसार सुरक्षाका लागि नेपाल प्रहरीका प्रहरी उपरीक्षक र सशस्त्र प्रहरीका प्रहरी उपरीक्षकको कमाण्डमा ठूलो संख्यामा सुरक्षाकर्मी परिचालन गरिएको छ ।

कैलालीका प्रमुख जिल्ला अधिकारी स्वयं टीकापुरमै रहेका छन् । २०७२ साल भदौ ७ गते अर्थात आजकै दिन नेपाल प्रहरीका एसएसपी र एकजना नाबालक सहित ८ जनाको ज्यान जाने गरी टिकापुरमा भएको घटनाको ४ वर्षपछि थरुहट थरुवान संघर्ष समितिले राष्ट्रिय सम्मेलन गर्न थालेको छ ।

सम्मेलनमा पूर्व प्रधानमन्त्री डा.बाबुराम भट्टराई, किशोर नेपाल, विश्लेषक खगेन्द्र संग्रौला लगायतका वक्ताहरुको सहभागिता रहेको छ । २५ जिल्लाबाट करिव ८ हजार सहभागि उपस्थित गराउने लक्ष्य सहित सम्मेलन आयोजना गरिएको आयोजकले जनाएको छ ।

सम्मेलनका लागि टीकापुर क्षेत्रमा कुनै पनि उच्छृङ्खल क्रियाकलाप हुन नदिने आवश्यकता अनुसार सुरक्षाको सम्पूर्ण तयारी गरिएको कैलालीका प्रमुख जिल्ला अधिकारी यज्ञराज बोहोराले बताए ।

थारुहट थरुवान संघर्ष समितिका पदाधिकारीले टीकापुरमा सम्मेलन गर्नुको उद्देश्य सामाजिक सद्भाव विगार्नु नभई सद्भावलाई कायम राख्ने भएको बताउँदै आएका छन् । टीकापुरमै राष्ट्रिय सम्मेलन गर्नु पर्छ भनेर बलियो लबिङ गरेको थारु नेता लक्ष्मण थारुले बिग्रेको सद्भावलाई पुरानै अवस्थामा र्पुयााउन सम्मेलनको तयारी गरेको बताए ।

सम्मेलनको कार्यतालिका अनुसार भदौ ७ गते अर्थात आज उद्घाटन कार्यक्रम भइरहेको छ । भदौ ८ गते बन्दसत्र चल्नेछ भने ९ गते टीकापुर घोषणापत्र जारी गर्दै कार्यक्रम सम्पन्न हुने आयोजकले जनाएको छ ।