स्याङ्जाबाट एकैदिन दुई ज्ञापनपत्र :- प्रधानमन्त्री र सञ्चारमन्त्रीको ध्यानाकर्षण

१८ भदौ,स्याङ्जा । रेडियो नेपाल सुदुरपश्चिम प्रादेशिक केन्द्र दिपायलमा लामो समयदेखि कार्यरत पत्रकारहरु प्रकाश बम, सुनिता रावल र चक्रवहादुर कुवँरलाई राजनीतिक पूर्वाग्रह साँधेर रेडियो प्रसार विकास समितिले कामबाट हटाएको घटनाप्रति प्रेस युनियनले ध्यानाकर्षण गर्दे पुर्नबहालीको माग राखेर सञ्चार तथा सूचना प्रविधि मन्त्री गोकुलप्रसाद बाँस्कोटालाई आज ज्ञापनपत्र बुझाएको छ ।

नेपाल प्रेस युनियन स्याङ्जाका अध्यक्ष प्रदीप कोइरालाद्धारा हस्ताक्षरित ज्ञापनपत्र इलाका प्रशासन कार्यालयका प्रमुख दामोदर शर्मा पंगेनीमार्फत जिल्लामा क्रियाशिल पत्रकारहरुको टोलीले बुझाएका हुन । प्रेस युनियनले तीनै जना पत्रकारहरुलाई तत्काल पूर्नबहाली गर्न यसअघि पटक पटक दबाब दिर्दै आएपनि रेडियो नेपालको व्यवस्थापन पक्षले कुनै सुनुवाई नगरेकाले हामी थप आन्दोलनमा जान बाध्य भएको ज्ञापनपत्रमा उल्लेख छ ।

ज्ञापनपत्रमा भनिएको छ वर्तमान सरकारले सरकारी सञ्चारमाध्यममा आफ्ना पार्टीका कार्यकर्ता भर्ती गर्ने षडयन्त्रले लामो समयदेखि काम गरिरहेका ब्यवसायिक पत्रकारलाई निष्कासन तथा स्ट्रन्जरको म्याद थप नगरेको प्रेस युनियनको निश्कर्ष छ । युनियन यस्ता क्रियाकलापको विरोध एवं भत्सर्ना गर्दै तत्काल सच्याउन माग गर्दछ ।

त्यस्तै प्रेस स्वतन्त्रता विरोधी विभिन्न प्रावधान रहेको र सर्वत्र विरोध भएपछि केही समय स्थगन गरिएको मिडिया काउन्सिल विधेयक सरोकारवाला संघ संस्थासँग कुनै सल्लाह र परामर्श नगरी एकाएक राष्ट्रियसभाबाट प्रक्रिया अघि बढाएको प्रति युनियनको ध्यानाकर्षण भएको जनाएको छ । सरोकारवालाहरुको मागलाई सम्बोधन गर्दै संसदमा रहेका दलहरुको सहमतिबाटै मिडिया काउन्सिल लगायत विधेयक पारित गर्न युनियनले माग गरेको छ ।

प्रेस युनियन सदैव पत्रकारहरुको हकहित र प्रेस स्वतन्त्रताको पक्षमा लडिरहने प्रण गर्दै अल्टिमेटमसहित तीनै जना पत्रकारहरुलाई तत्काल पूर्नवहाली गर्न जोडदार माग राख्दै पत्रकारको हकहित र प्रेस स्वतन्त्रता विरोधी कुनै पनि क्रियाकलाप सह्य नहुने सरोकारवाला सबैमा स्मरण गराउदैं माग पुरा नभए थप आन्दोलनमा जाने समेत उल्लेख छ ।

उता नेपाल पत्रकार महासंघ स्याङ्जाले पनि सर्वोच्च अदालतको आदेशपछि पुन पक्राउ गरिएका पोखराका पत्रकार ओम हमालको रिहाइको लागि जिल्ला प्रशासन कार्यालय स्याङ्जामार्फत प्रधानमन्त्रीलाई ज्ञापनपत्र बुझाएको छ । शाखाका अध्यक्ष ओमप्रकाश शर्माद्धारा हस्ताक्षरित ज्ञापनपत्र प्रमुख जिल्ला अधिकारी कोषराज निरौलामार्फत बुझाइएको हो ।