गाई र कुकुर हत्याको विरोधमा राजधानीको माइतीघरमा प्रदर्शन

१९ भदौ, काठमाडौं । सुर्खेतमा गाई र खोटाङमा कुकुर हत्याको विरोधमा राजधानीको माइतीघरमा विरोध प्रदर्शन भएको छ । पशु कल्याण संघ नेपालको अगुवाईमा बुधबार राजधानीको माइतीघरमा प्रदर्शन गरिएको हो ।

पशु कल्याण संघ नेपालकी अध्यक्ष स्नेहा श्रेष्ठले गाई र कुकुर हत्या मानवीय संवेदनहीनता भएको भन्दै सरोकारवालाको चर्को आलोचना गरिन् । उनले खोटाङमा कुुकुरको सामूहिक हत्या भएकोविरुद्ध प्रशासनमा उजुरी दिदाँ उल्टै धम्क्याउँने काम भएको भन्दै आक्रोश समेत पोखिन् ।

प्रदर्शनमा सहभागीहरुले पशुपन्छीको स्याहारः हाम्रो संस्कार, पशु हाम्रो साथी हो मार्न पाइँदैन, तीन तहको सरकार खै पशुप्रति जिम्मेवार रु लगायतका नारा लेखिएका प्लेकार्ड बोकेका थिए । यस्तै प्रदर्शनमा सहभागीहरुले पशुहरुको प्रतिक मखुण्डो समेत लगाएका थिए ।

प्रदर्शनमा पशुअधिकारसँग सम्बन्धित अधिकारकर्मी र सरोकारवालाहरुको उल्लेख्य सहभागिता रहेको थियो । गत साता सुर्खेत र खोटाङमा क्रमश गाई र कुकुरको हत्या भएको समाचार सार्वजनिक भएको थियो ।