असोज २६ मा चिनियाँ राष्ट्रपतिको दुईदिने भ्रमण ?

१९ भदौ, काठमाडौं। सबै कुरा यथावत रहेको अवस्थामा चिनियाँ राष्ट्रपति सी चिनफिङ्ले आगामी असोज २६ र २७ गते नेपालको २ दिने भ्रमण गर्नुहुने ‘मोटामोटी तय’ भएको बुझिएको छ, तर यसलाई दुवैपक्षले अत्यन्त गोप्य राख्ने र काठमाडौं र बेईजिङ्ले एकसाथ घोषणा गर्ने बेइजिङ्को आग्रहअनुरुप प्रक्रिया अघि बढाईदैछ । काठमाडौंमा भ्रमणको भित्री तयारी भने युद्धस्तरमा चलिरहेको छ ।

आगामी आईतबार चिनियाँ विदेशमन्त्री एवं चिनियाँ राज्यपरिषदका सदस्य वाङ् यी यसै सिलसिलामा दुईदिने नेपाल भ्रमणको लागि कराँचीबाट काठमाडौं आउँदैछन् । पोहोर डिसेम्बरमा भएको यस्तै बैठकको निरन्तरताको रुपमा यही शनिबार (भदौ २१ मा) पाकिस्तानको इस्लामावादमा चीन–पाकिस्तान–अफगानिस्तानको त्रिपक्षीय बैठक हुँदैछ ।

सो बैठक सकेर चिनियाँ विदेशमन्त्री वाङ्ले भदौ २३ र २४ गते नयाँ दिल्लीको भ्रमण गर्ने र ३४८८ किलोमिटर लामो दुई देशको विद्यमान सीमा विवादबारे वार्ता गर्ने कार्यक्रम थियो, तर भारतीय पक्षको आग्रहमा सो बैठक अनुकूल समय मिलाएर पछि गर्ने भएपछि उनको भारत भ्रमण स्थगित भएको हो ।

विदेशमन्त्री वाङ्को काठमाडौं भ्रमणका अवसरमा आफ्ना नेपाली समकक्षी प्रदीप ज्ञवालीसँग बेल्ट–एण्ड–रोड लगायत नेपालमा सञ्चालित आयोजनाहरूमा चिनियाँहरूबाट भइरहेको कामबारे पनि छलफल हुने बुझिएको छ । मूख्यतः राष्ट्रपति सी चिनफिङ्को नेपाल भ्रमणका कार्यक्रम र एजेण्डा सुनिश्चित गर्ने विषयबस्तुमा दुवै पक्षको वार्ता केन्द्रित हुनेछ ।

राष्ट्रपति सी आगामी असोज २४ देखि २६ गतेसम्म भारतको तीनदिने भ्रमणमा जाने र त्यताबाट स्वदेश फर्किने क्रममा नेपालको २ दिने भ्रमण गर्ने प्रारम्भिक कार्यक्रम बनाइएको छ । उनी नयाँ दिल्ली नगई सोझै दक्षिण भारतको तामिलनाडूस्थित ममल्लापुरम् जाने र त्यही प्रधानमन्त्री नरेन्द्र मोदीले उनको स्वागत गर्नेछन् । दुवै देशका शिर्ष नेताहरू तामिलनाडूमा दोस्रो अनौपचारिक शिखर वार्तामा सरिक हुने कार्यक्रम छ । पहिलो यस्तै अनौपचारिक शिखर वार्ता चीनको उहान शहरमा गत बैशाख १४ र १५ गते भएको थियो ।

राष्ट्रपति सीको नेपाल भ्रमण हुने भयो र नेपाली पक्षले लापरवाही नगरी सफल बनाउने दिशामा तयारी गरेमा यो भ्रमणबाट नेपालको प्रगतिका लागि नयाँ ढोका खुल्ने छ । कश्मिरमा हात हालेको भारतले कश्मिरको महाभारतबाट पार पाउन चीनतिर लचिलो नीति अपनाउने स्पष्टै देखिन्छ ।

त्यसैगरी हङ्कङमा हालैको विद्रोहबाट घाईते भएको र मुसलमान बहुल पश्चिम चीनले कायल बनाइरहेको बेईजिङ्ले कश्मिर मामिलामा भारतलाई चिढाउने हदसम्म पाकिस्तानलाई नबोक्ने रवैया देखाएको छ ।