चिनियाँ विदेशमन्त्री वाङ पाकिस्तान भ्रमण सकेर काठमाडौं आउँदै

२२ भदौ, काठाडौं । चिनियाँ सरकारका विदेशमन्त्री एवं स्टेट काउन्सिलर वाङ यी तीनदिने औपचारिक भ्रमणकालागि आझ साँझ काठमाडौं झर्दै छन् । १९ सदस्यीय प्रतिनिधिमणडलकाे नेतृत्व गर्दै नेपाल आउन लागेका वाङले तीन दिने नेपाल बसाइका क्रममा राष्ट्रपति विद्यादेवी भण्डारी, प्रधानमन्त्री खड्गप्रसाद ओली र परराष्ट्रमन्त्री प्रदीप ज्ञवालीसँग सोमबार भेटवार्ता गर्ने कार्यक्रम तय भएको परराष्ट्र मन्त्रालयले जानकारी दिएको छ ।

नेपाल र चीनका परराष्ट्र मन्त्रालयले हिजो साँझ एकैसाथ विज्ञप्ती जारी गरी भ्रमण बारे जानकारी दिएका छन् । चिनियाँ विदेश मन्त्रालयका प्रवक्ता कन सुहाङले नियमित पत्रकार सम्मेलनमा वाङले पाकिस्तान भ्रमण सकेर नेपाल भ्रमण गर्न लागेको घोषणा गरेका थिए । शनिबार पाकिस्तान भ्रमणमा गएका विदेशमन्त्री यी इस्लामावादबाट सिधै आइतबार अपरान्ह ४ः२० बजे काठमाडौं उत्रनेछन् ।

दक्षिणी छिमेकी भारतका विदेशमन्त्री नेपाल भ्रमण आएको तीन साता नपुग्दै उत्तरी छिमेकी चीनका विदेशमन्त्री नेपाल आउन लागेका हुन् । दुई साताअघि ४ भदौमा भारतीय विदेशमन्त्री सुब्रमण्यम् जयशंकर पनि नेपाल भ्रमणका समयमा नेपाल–भारतका परराष्ट्रमन्त्रीस्तरीय आयोगको बैठकमा सहभागी भएका थिए ।

परराष्ट्रमन्त्र ज्ञवालीसँग सोमबार हुने औपचारिक वार्तामा नेपाल र चीनबीच सबै पक्षमा छलफल हुनेछ । नेपालले चिनियाँ राष्ट्रपति सी जिनपिङको नेपाल भ्रमणमा पुनः जोड दिने तयारी गरेको छ । नेपाल र चीनबीच यसैबीचमा भएका सहमति र सम्झौता कार्यान्वयनका उपायबारे पनि छलफल हुने परराष्ट्र स्रोतले जानकारी दिएको छ । विशेष गरी सिगात्से–केरुङ–काठमाडौं रेलमार्गको सम्भाव्यता अध्ययन, डिपिआर तयारीका लागि छलफल हुनेछ ।

चिनियाँ विदेशमन्त्रीको नेपाल भ्रमणलाई चीनबाट भविष्यमा हुने उच्चस्तरीय भ्रमणको तयारीका रूपमा पनि लिइएको छ । अनुभवी करिअर डिप्लोम्याट मानिने यी नेपालबारे लामो समयदेखि जानकार छन् ।

परराष्ट्रमन्त्री ज्ञवालीले समकक्षी यीको सम्मानमा सोमबार साँझ रात्रिभोजको आयोजना गर्ने कार्यक्रम रहेको परराष्ट्र मन्त्रालयले जनाएको छ । रात्रिभोजमा परराष्ट्र मन्त्रालयका उच्च अधिकारीहरू, दुवैतर्फका कूटनीतिक नियोगका प्रमुखहरूसहितका अधिकारी सहभागी हुने कार्यक्रम रहेकाछ ।

परराष्ट्रमन्त्रीस्तरीय बैठकमा आर्थिक र विकास साझेदारीमा पनि छलफल गर्ने तयारी नेपालले गरेको छ । चिनियाँ विदेशमन्त्री वाङ यीको सोमबारदेखि हुने नेपालको औपचारिक भ्रमण र द्विदेशीय प्रतिनिधिमण्डलस्तरीय वार्तामा नेपाल–चीन सम्बन्धका समग्र पक्षका साथै पारस्परिक हित र चासोका सबै विषयमा विचार–विमर्श हुने मन्त्री ज्ञवालीले जानकारी दिएका छन् । उनले दुई देशबीच विगतमा भएका सन्धि–सम्झौता तथा नेपालमा सञ्चालित विकास–निर्माणका परियोजनाको समीक्षाका साथै तिनको द्रुत कार्यान्वयनमा जोड दिइने पनि दाबी गरे ।

चिनियाँ राष्ट्रपतिले नेपाल भ्रमण गर्न यो उपयुक्त समय हो भन्ने हामीले जानकारी गराएका छौँ, चीनको उच्चस्तरीय नेतृत्वको आगमन हाम्रा लागि उत्साहको विषय हो, तर भ्रमणको मिति निर्धारण भएको छैन

चीन र नेपालबीच हिमालय सीमापार बहुआयामिक सम्पर्क सञ्जाल निर्माण गर्न भएका समझदारी, रेलमार्ग निर्माण तथा परस्परमा सम्पर्क विस्तार र दुई देशबीच भएको यातायात तथा पारवहन सम्झौतालगायत विषयमा केन्द्रित रहेर वार्ता हुने मन्त्री ज्ञवालीले बताए । चार वर्षपछि चिनियाँ विदेशमन्त्रीबाट नेपाल भ्रमण हुन लागेको हो । विदेशमन्त्री वाङ चीनको राज्य परिषद्को सदस्यसमेत हुन् ।

चीनको भौतिक एवं आर्थिक विकासबाट नेपाल कसरी लाभान्वित हुन सक्छ भन्नेमा नेपालको ध्यान केन्द्रित रहेको उल्लेख गर्दै उनले वार्तामा द्विपक्षीय हित, क्षेत्रीय र अन्तर्राष्ट्रिय चासोका विविध विषयमा पनि विचार–विमर्श हुने बताए ।

चिनियाँ राष्ट्रपतिको नेपाल भ्रमण सम्बन्धमा मन्त्री ज्ञवालीले अहिले नेपाल भ्रमण गर्न उपयुक्त समय भएको जानकारी गराएको बताएका छन् । चीनको उच्चस्तरीय नेतृत्वको आगमन हाम्रा लागि उत्साहको विषय हो, तर भ्रमणको मिति निर्धारण भएको छैन ।’ चिनियाँ राष्ट्रपतिले उपयुक्त समयमा भ्रमण गर्नेमा आफू आशावादी रहेको परराष्ट्रमन्त्रीले उल्लेख गरेका छन् । यसअघि राष्ट्रपति विद्या भण्डारीले चीन भ्रमणमा जाँदा चिनियाँ समकक्षीलाई नेपाल भ्रमणको निमन्त्रणा दिएकी छन् भने राष्ट्रपति सीले सकारात्मक जवाफ दिएका थिए । विदेशमन्त्र वाङ आफ्नो नेपाल बसाई सकेर आउने मंगलबार बिहान स्वदेश फर्किने कार्यक्रम तय भएको छ ।

र याे पनि … असोज २६ मा चिनियाँ राष्ट्रपतिको दुईदिने भ्रमण ?