नेपालले बंगलादेशलाई २६२ रनको लक्ष्य दियो

२२ भदौ, काठमाडौं । श्रीलंकामा भइरहेको एसीसी १९ वर्षमुनि एसिया कप क्रिकेटको दोस्रो खेलमा नेपालले टेष्ट राष्ट्र बंगलादेशलाई २६२ रनको लक्ष्य दिएको छ । कोलम्बोमा टस हारेर पहिले ब्याटिङ गरेको नेपालले पुरै ५० ओभर खेल्दै ८ विकेट गुमाएर २६१ रन बनायो । नेपालका लागि पवन सर्राफ र सन्दीप जोराले अर्धशतकीय इनिङ्स खेलेका थिए । पवनले १०९ बलमा ८ चौका र १ छक्कासहित ८१ रनको योगदान दिए । विस्फोटक ब्याटिङ गरेका सन्दीपले ३७ बलमा ३ चौका र ३ छक्कासहित ५६ रन बनाए ।

यस्तै रित गौतमले ३२ रन जोड्दा कुशल मल्लले २८ रन बनाए । त्यस्तै भिम सार्कीले २१ रन बनाउँदा कप्तान रोहित पौडेलले १४ रन बनाए । बंगलादेशका लागि तान्जिम हसन शकिब र साहिन आलमले २र२ विकेट लिए ।
अघिल्लो चरण प्रवेशको सम्भावना बलियो बनाउन नेपाललाई आजको खेल जित्नैपर्ने दबाब छ । पहिलो खेलको पराजयले नेपालको सेमिफाईनल पुग्ने सम्भावना कठिन बनेको छ । पहिलो खेलमा नेपाल घरेलु टोली श्रीलंकासंग डीएल पद्वतीका आधारमा ५ विकेटले पराजित भएको थियो ।