नेपाल चीन द्विपक्षीय वार्ता सुरु, विरोध प्रदर्शनमा उत्रिएकामाथि प्रहरीकाे धरपकड

२३ भदौ, काठमाडौं । नेपाल चीन परराष्ट्रमन्त्रीस्तरीय औपचारिक वार्ता राजधानीमा सुरु भएको छ । नेपालका तर्फबाट परराष्ट्रमन्त्री प्रदीपकुमार ज्ञवालीले नेतृत्व गरेका छन् भने चीनका तर्फबाट समकक्षी याङ यीले गरेका छन् ।चार वर्षको अन्तरालमा उक्त वार्ता काठमाडौंमा भएको हो । आर्थिक र विकास साझेदारीमा केन्द्रित रहेर हुने वार्तामा नेपाल–चीन सम्बन्धका समग्र पक्षका साथै पारस्परिक हित र चासोका सबै विषयमा विचारविमर्श हुनेछ ।

सो वार्तामा दुई देशबीच विगतमा भएका सन्धि सम्झौता तथा नेपालमा सञ्चालित विकास–निर्माणका परियोजनाको समीक्षाका साथै तिनको द्रुत कार्यान्वयनमा जोड दिइनेछ । नेपालको विकासको भरपर्दो साझेदार चीनले हासिल गरेको भौतिक एवं आर्थिक विकासबाट नेपाल कसरी लाभान्वित हुनसक्छ भन्ने विषयका साथै द्विपक्षीय हित, क्षेत्रीय र अन्तर्राष्ट्रिय चासोका मामिलामा पनि गहन छलफल हुनेछ ।

हिजो मात्रै नेपाल भ्रमणमा आएका रहेका चिनियाँ विदेशमन्त्री यीसँग आज द्विपक्षीय वार्ता सुरु भएको हो । वार्तामा नेपालका तर्फबाट परराष्ट्रमन्त्री प्रदीपकुमार ज्ञवाली, अर्थमन्त्री युवराज खतिवडा, चीनका लागि नेपाली राजदूत लीलामणि पौड्याल, सचिव वैरागी, अर्थ सचिव राजन खनाल, परराष्ट्र मन्त्रालयका सहसचिव कालीप्रसाद पोखरेललगायत वरिष्ठ अधिकारी सहभागी रहेका छन् ।

चीनका तर्फबाट विदेशमन्त्री वाङ यी नेतृत्वको टोलीमा विदेश सचिव लु झाउबी, नेपालका लागि चिनियाँ राजदूत हउ यान्छी, चिनियाँ अन्तर्राष्ट्रिय विकास सहायता नियोग (सीआईसीडीए) का उपाध्यक्ष, विदेशमन्त्रालयको एशिया विभागका अधिकारीलगायत वरिष्ठ चिनियाँ अधिकारी वार्तामा सहभागी छन् ।

चीन र नेपालबीच हिमालय सीमापार बहुआयामिक सम्पर्क सञ्जाल निर्माण गर्न भएको समझदारीका साथै परस्परमा सम्पर्क विस्तार र दुई देशबीच भएको यातायात तथा पारवहन सम्झौता तथा नेपालको व्यापार विविधीकरण, व्यापारघाटा घटाउन चिनियाँ सहयोगलगायत विषयमा पनि छलफल हुनेछ । परराष्ट्र सचिव शङ्करदास वैरागीका अनुसार वार्तापछि मनाङमा चिनियाँ सहयोगमा अस्पताल निर्माण, भूकम्प पीडितलाई पाँच हजार थान पाल उपलब्ध गराउने तथा चिनियाँ स्वयम्सेवकहरूले नेपाली शैक्षिक प्रतिष्ठानमा चिनियाँ भाषा अध्यापन गराउनेसम्बन्धी तीनवटा बेग्लाबेग्लै समझदारीपत्रमा हस्ताक्षर हुनेछ ।

द्विपक्षीय वार्तामा नेपालले आर्थिक लाभसँग जोडिएका विषयलाई अजेण्डाका रुपमा तयार गरेको छ । हिजो नेपाल आएका चिनियाँ विदेश मन्त्री यी आज विहानैदेखि काठमाडौंको दृश्यावलोकनका लागि निस्किएका थिए । बिहानै चन्द्रगिरि पुगेका मन्त्री यी एक घण्टा हाइकिङमा रमाए । उनी लगायतको टोली चन्द्रागिरीबाट मातातीर्थसम्म हाइकिङमा गएको थियो ।

यसैबीच चिनियाँ मन्त्री यीको विरोधमा राजधानीमा निस्किएको महिला समूहमाथि प्रहरीले धरपकड गरेको छ । भाटभटेनीस्थित चिनियाँ दूतावास अगाडि जम्मा भएका विरोध कार्यक्रममा महिला अधिकारकर्मीहरुको सहभागिता थियो । नेपाली चेली चीनमा विक्री भइरहेको भन्दै उक्त समूहले नाराबाजी गरेको थियो । विरोधमा उत्रिएका १० जना महिलालाई प्रहरीले पक्राउ गरेको छ ।

उता, नेपाल भ्रमणमा रहेका चिनियाँ विदेशमन्त्री यीले आज साँझ राष्ट्रपति विद्यादेवी भण्डारी र प्रधानमन्त्री खड्गप्रसाद  ओलीसँग बेग्ला–बेग्लै भेट गर्ने कार्यक्रम रहेको परराष्ट्र मन्त्रालयले जनाएको छ ।