ब्याडमिन्टन : प्रिन्सको विजयी शुरुआत, दिपेश र रत्नजित सेमिफाइनलमा

२७ भदौ, काठमाडौं । नेपालका जुनियर ब्याडमिन्टन च्याम्पियन प्रिन्स दाहालले संयुक्त अरब इमिरेटस् (युएई)को दुबईमा शुरु भएको ‘दुबई जुनियर इन्टरनेसनल ब्याडमिन्टन सिरिज’मा विजयी शुरुआत गरेका छन् ।

ब्वाइज एकलमा प्रिन्सले युएईका खेलाडी भरुणकार्थिक बराथी मोहनलाई २–० सोझो सेटमा पराजित गरे । उनले उक्त खेल २१–८ र २१–१५ अङ्कले जिते । यसअघि मिक्स डबल्समा समेत प्रिन्स र सानिया चन्दको जोडीले युएईका नवहान नाजिव र कारोलिन कोल्कुहोउनको जोडीलाई २–० सेटले पराजित गरेको थियो । प्रिन्स र सानियाको जोडीले उक्त खेल २१–१४ र २१–१७ अङ्कले जितेको हो ।

दिपेश र रत्नजित सेमिफाइनलमा

एपीएफका दिपेश धामी र नेपाली सेनाका रत्नजित तामाङ सुनसरीको इटहरीमा जारी योनेक्स सनराईज नवौँ पुष्पलाल स्मृति राष्ट्रिय ब्याडमिन्टन प्रतियोगिताको सेमिफाइनलमा प्रवेश गरेका छन् ।

इटहरी रङ्गशालास्थित कभर्ड हलमा हिजो भएको क्वाटरफाइनलमा दिपेशले रुकेश महर्जनलाई २१–१६ र २१–१६ अङ्कले तथा रत्नजितले पुलिसका सुनिल जोशीलाई २१–१० र २१–१३ अङ्कले हराउँदै सेमिफाइनल प्रवेश गरेका हुन् ।

यस्तै सेनाका नवीन श्रेष्ठले आफ्नै क्लबका प्रफुल महर्जनलाई १३–२१, २१–११ र २१–१५ अङ्कले हराउँदै सेमिफाइनलमा स्थान बनाए । यस्तै भोजपुरका विकास श्रेष्ठले पुलिसका जीवन आचार्यलाई २१–७, १८–२१ र २१–११ अङ्कले हराउँदै अन्तिम चारमा स्थान बनाए ।