नदेज्दा कप फुटबलमा नेपाल बन्याे उपविजेता

२७ भदौ, काठमाडौं । नदेज्दा कप फुटबलमा नेपाली महिला टोली उपविजेता बनेकाे छ । किर्गिस्तानमा हिजो भएको फाइनल खेलमा नेपाल उज्वेकिस्तानसँग ३–२ गोलले पराजित भएको हो ।

मध्यान्तर अघिको खेलमा उज्वेकिस्तानले १–० गालेको अग्रता लिएको थियो । उज्वेकिस्तानले खेलको ३९औँ मिनेटमा पहिलो गोल गरेको थियो । मध्यान्तरपछिको खेलमा उज्वेकिस्तानले थप दुई गोल गरेको हो । उज्वेकिस्तानले खेलको ५४औँ तथा ६४औँ मिनेटमा गोल गरेको हो । नेपालका लागि सावित्रा भण्डारीले खेलको ६७औँ तथा ९०औँ मिनेटमा गोल गरेकी थिइन् । उक्त प्रतियोगितामा सावित्रा सर्वाधिक गोलकर्ता बनिन् । उनले प्रतियोगिता भर सात गोल गरिन् । उनले पहिलो खेलमा किर्गिस्तानसँग ह्याट्रिकसहित चार गोल, दोस्रो खेलमा ताजकिस्तानविरुद्ध एक तथा आजको फाइनल खेलमा दुई गोल गरेकी थिइन् ।

नेपालले खेलकूदमा राम्रो प्रगति गर्न सक्छः उपाध्यक्ष सिंह

एशियाली कुस्ती सङ्घका उपाध्यक्ष ब्रीजभूषण शरण सिंहले नेपाली युवाले खेलकूदमा राम्रो प्रगति गर्न सक्ने बताएका छन् । नेपाल कुस्ती सङ्घ र भारतीय कुस्ती सङ्घले पोखरामा संयुक्तरुपमा आयोजना गरेको पत्रकार सम्मेलनमा तेह्रौँ दक्षिण एशियाली खेलकूद प्रतियोगिता (साग) को तयारीबारे जानकारी लिन आएका उपाध्यक्ष सिंहले कुस्तीको विकासका लागि खेलाडी उत्पादन र पूर्वाधार विकासमा ध्यान दिनुपर्नेमा जोड दिए ।

भारतको लोकसभा सदस्य, भारतीय कुस्ती सङ्घ र सार्क कुस्ती सङ्घका समेत अध्यक्ष रहेका सिंहले भारतको कुस्तीबाट नेपालले फाइदा लिन सक्ने बताए । नेपालमा कुस्ती खेलका लागि भारतले सहयोग गर्ने उनले प्रतिबद्धता व्यक्त गरे । “अब साग नहुने हो कि भन्ने आशङ्का कुनै पनि राष्ट्रले गर्न हुँदैन”, सिंहले भने ।

नेपाल कुस्ती सङ्घका अध्यक्ष राज मोहम्मद अन्सारीले सागको तयारी भइरहेको बताए । उनले कुस्ती खेल आयोजना स्थल पोखरा हुन सक्ने भन्दै त्यसको तयारीस्वरुप असोजको पहिलो हप्ता नेपाल तथा भारतबीच मैत्रीपूर्ण कुस्ती खेल आयोजना गरिने बताए ।