मौसम खराब भएपछि धान खेतमै हेलिकोप्टर अवतरण

३१ भदौ, काठमाडौं । आज विहानैदेखि मुलुकको मौसम बदलिएको छ । यतिखेर देशका अधिकांश भूभागमा बर्षा भइरहेको मौसम तथा जलवायु विभागले जनाएको छ ।

वर्षाका कारण काठमाडौंस्थित त्रिभुवन अन्तर्राष्ट्रिय विमानस्थलमा विमान उडान र अवतरण हुन सकिरहेको छैन । तर यही प्रतिकूल मौसमका कारण काठमाडौंका लागि विभिन्न स्थानबाट उडेका हेलिकोप्टर भने नजिकैको काभ्रे र सिन्धुलीका खेतमा अवतरण गरिएका छन् ।

सिम्रिक, मनाङ र कैलाश एयरका सात वटा हेलिकोप्टर काभ्रे र सिन्धुलीका विभिन्न स्थानमा अवतरण गराइएका छन् ।

मौसममा एकाएक खरावी आएकाले काठमाडौंका लागि उडेका हेलिकोप्टर धान खेतमा अवतरण गरिएको बताइएको छ । हेलिकोप्टरमा यात्रा गरिरहेका सबै यात्रु सकुशल रहेको सम्वद्ध एयरले जनाएका छन् ।

ती हेलिकोप्टरमा अधिकांश विदेशी यात्रु रहेका छन् । मौसम सफा भएपछि ती हेलिकोप्टर पुन ः उडाइने एयरलाइन्सहरुले जनाएका छन् ।

जिल्ला प्रहरी कार्यालय काभ्रेका प्रवक्ता डिएसपी दिपक गिरीका अनुसार, सिम्रिक एयरको हेलिकप्टर पुन: काठमाडौंको लागि उडिसकेको छ।