छात्रालाई निःशुल्क प्याड वितरण गरिने

१० असोज, काठमाडौं । सङ्घीय सरकारका तीन मन्त्रालयले विद्यालय तहमा अध्ययन गर्ने छात्रालाई निःशुल्क प्याड वितरण गर्ने तयारी गरेका छन् ।

स्वास्थ्य तथा जनसङ्ख्या मन्त्रालय, महिला, बालबालिका तथा ज्येष्ठ नागरिक मन्त्रालय र शिक्षा तथा विज्ञान प्रविधि मन्त्रालयले समन्वयमा यससम्बन्धी नयाँ नीतिको मस्यौदा अन्तिम चरणमा पुगेको जनाएका छन् ।

नीति कार्यान्वयनको जिम्मा स्वास्थ्य तथा जनसङ्ख्या मन्त्रालयलाई दिइएको बिहीबार आयोजित कार्यक्रममा महिला, बालबालिका तथा ज्येष्ठ नागरिकमन्त्री थममाया थापाले जानकारी दिइन । उनले नयाँ नीति छिट्टै कार्यान्वयनमा आउने जानकारी दिँदै विद्यालयमा कपडाबाट बनेका प्याड वितरण गरिने बताइन ।

प्याड निर्माणमा तालीम तथा पैरवी गर्दै आएको संस्था एक्स्पोज नेपालको १२आँै वार्षिकोत्सवका अवसरमा आयोजित कार्यक्रममै मन्त्री थापाले स्थानीय तहमा प्याड निर्माणमा तालीमको थप कार्यक्रम सञ्चालन गर्न आवश्यकता रहेकोमा जोड दिइन् ।

‘मर्यादित र स्वस्थ महिनावारीका बारेमा खुलेर कुरा गरौँ’ नाराका साथ सो संस्थाले आफ्नो वार्षिकोत्सव मनाएको थियो । प्रदेश नं ३ का प्रदेशसभा सदस्य जीवन खड्काले विद्यालय तहमा किशोर किशोरी शिक्षा प्रवद्र्धन गर्न आवश्यक रहेको चर्चा गर्दै महिनावारीका कारण विद्यालयमा छात्रा अनुपस्थित हुने अवस्थालाई अन्त्य गर्न जरुरी रहेको बताए ।

आयोजक संस्थाका अध्यक्ष ज्ञान महर्जनले चार वर्षको अवधिमा संस्थाले एक हजार ८०० महिलालाई प्याड बनाउन निःशुल्क तालीम दिएको जानकारी दिए ।