राष्ट्र बैंक बालुवाटारमा नयाँ नोट साट्नेको भिड

१० असोज, काठमाडौं । दशैंका लागि नेपाल राष्ट्र बैंकले आजबाट नयाँ नोट वितरण शुरु गरेको छ । काठमाडौंसँगै देशका विभिन्न स्थानमा सटही सेवा उपलब्ध गरिएका छन् ।

राष्ट्र बैंकको मुद्रा व्यवस्थापन विभागका कार्यकारी निर्देशक लक्ष्मीप्रपन्न निरौलाले सटही सुविधा असोज १० देखि १७ गतेसम्म उपलब्ध हुने जानकारी दिए ।

शुक्रबार दिउँसो काउन्टर बन्द गर्ने बेलासम्म ८ सय ५७ जनाले मात्रै नयाँ नोट सटही गरेको राष्ट्र बैंकले जनाएको छ ।नेपाल राष्ट्र बैंकले दसैंको नयाँ नोट सटही सुरु गरेपछि सर्वसाधारणको भिड लागेको बैंकले जनाएको छ। राष्ट्र बैंकले यसपाली नयाँ र एक पटक प्रयोग भइसकेको सुकिलो नोट बाँड्दैछ।

मुद्रा व्यवस्थापन विभाग, बालुवाटार र विराटनगर, जनकपुर, बीरगञ्ज, पोखरा, सिद्धार्थनगर, नेपालगञ्ज र धनगढी कार्यालय तथा राष्ट्रिय वाणिज्य बैंक लिमिटेड, नेपाल बैंक लिमिटेड र कृषि विकास बैंक लिमिटेडका उपत्यकास्थित कार्यालयबाट नोट सटही गरिएको छ।

यसपाली थापाथली कार्यालय बन्द भएकाले बालुवाटारबाट नोट बाँडिएको छ। सर्वसाधारणको वालुवाटारमा लामो लाइन लागेको छ।

राष्ट्र बैंकले ५, १०, २०, ५० र १०० रुपैयाँ दरका एकरएक पाकेट गरी प्रति व्यक्ति अधिकतम १८ हजार ५०० रुपैयाँसम्म सटही सुविधा उपलब्ध गराएको छ। यसभन्दा बढी सटही सुविधा आवश्यक हुने व्यक्तिलाई सुकिलो नोट उपलब्ध गराईएको छ।