दशैँको लागि १४ हजार खसीबोका, राँगा र कुखुरा काठमाडौं ल्याइए

१४ असोज, काठमाडौं । यस वर्षको दसैंका लागि १४ सयभन्दा बढी राँगा, खसीबोका, कुखुरा तथा माछा काठमाडौं ल्याइएको छ । पशु क्वारेन्टाइन काठमाडौं चेकपोष्टले दिएको जानकारी अनुसार सोमबारसम्ममा मासुका लागि यो संख्यामा चौपाया काठमाडौं ल्याइएको हो ।

दसैंको लागि २५ गाडीमा ६ सय २५ वटा राँगा तथा भैसी, ८ गाडीमा १ हजार ८१ वटा खसीबोका, २६ वटा गाडीमा ११ हजार ३ सय ७५ वटा कुखुरा, ८ वटा गाडीमा ९ हजार ८ सय १५ किलो माछा, १९ वटा गाडीमा ३ हजार ४० वटा अण्डा, ५ सय वटा हाँस, २ सय ५० लौकाट र ६ सय ७० च्याङ्ग्रा गरेर कुल ९४ वटा गाडीमा १४ हजार ५०१ चौपाया काठमाडौं ल्याइएको हो ।

बाँके, बारा, नवलपरासी, नेपालगंज, रौतहटबाट राँगाभैसी, दाङ, पाल्पा, धादिङ, कैलाली, नवलपरासी र चितवनबाट खसीबोका आयात गरिएको छ भने चितवन, नवलपरासी, कैलाली, धादिङ र नुवाकोटबाट कुखुरा, चितवन र कपिलवस्तुबाट माछा आयात गरिएको छ ।

त्यसैगरी, चितवन, पोखरा, धादिङबाट अण्डा, चितबाटै हाँस र लौकाट आयात गरिएको छ भने च्याङ्ग्रा मुस्ताङ र सुर्खेतबाट आयात गरिएको हो । पशु क्वारेन्टाइन कार्यालय काठमाडौका अनुसार आयात भएका १४ हजार ५०१ चौपायामध्ये कुनैमा पनि कैफियत भेटिएको छैन ।