त्रिविको उपकुलपतिमा तीन नाम सिफारिश

१७ असोज,काठमाडौं । दशैंको मुखैमा सरकारले त्रिभुवन विश्वविद्यालयमा रिक्त उपकुलपतिमा तीन जनाको नाम सिफारिश गरेको छ । सिफारिश कमिटीले मन्त्रिपरिषदलाई बुझाएको नाममा डा. भगवान कोइराला समेत परेका छन् । बाँकी दुई जनामा धर्मकान्त बाँस्कोटा र चन्द्रमणि पौडेलको नाम रहेको मन्त्रिपरिषद स्रोतले बताएको छ ।

नयाँ उपकुलपतिको नाम सिफारिश गर्न सहकुलपति एवं शिक्षामन्त्री गिरिराजमणि पोखरेलको संयोजकत्वमा समिति गठन भएको थियो । उक्त समितिले लामो समयको गृहकार्यपछि तीन जनाको नाम सिफारिश गरेको हो ।

हाल त्रिविको कायममुकाय उपकुलपतिका रुपमा जिम्मेवारी पाएकी सुधा त्रिपाठी भने सिफारिशमा परेकी छैनन् । उनी पनि नयाँ उपकुलपतिको दौडमा थिइन् ।

स्रोतका अनुसार प्रधानमन्त्री केपी ओलीले डा. भगवान कोइरालालाई जिम्मेवारी लिई दिन आग्रह गरेका छन् । तर कोइरालाले भने आफूले भनेका पदाधिकारी राख्ने भएमात्र स्वीकार्ने बताएको स्रोतको दावी छ ।