नवरात्रको आठौं दिन बिन्दबासिनी मन्दिर पोखरामा भक्तजनको घुईचो

१९ असोज, पोखरा । हिन्दू धर्मावलम्बीको मुख्य पर्व दसैंको आठौ दिन आज धुमधामसँग महाअष्टमी मनाइँदैछ । आज बिहानैदेखि मुलुकभरका शक्तिपीठ र देवीका मन्दिरमा श्रद्धालुको घुइँचो लागेको छ ।

देवीभागवतमा उल्लेख अनुसार प्राचीन कालमा दक्षप्रजापतिको यज्ञ नाश गर्न आश्विन शुक्ल अष्टमीमा ज्यादै शक्तिशाली भद्रकाली उत्पन्न भएकी थिइन् ।

महाअष्टमीमा शैलपुत्री, ब्रहृमचारिणी, चन्द्रघण्टा, कुष्माण्डा, स्कन्दमाता, कात्यायनी, कालरात्रि, महागौरी, सिद्धिदात्रीलगायत पार्वतीका विभिन्न स्वरूपका देवीहरूको पूजाआजा गरिन्छ । पूजापछि देवीलाई बोका, कुखुरा, हाँस, खसी, राँगो आदि बली दिइन्छ ।

यस दिन कुलदेवतालाई समेत बली दिने प्रचलन छ । पशु बली नगर्नेले नरिवल, कुभिण्डो, केरा, घिरौंलालगायत अर्पण गर्छन् । यसै दिन दसैंघर (हनुमानढोका)को मूल चोकमा तलेजु भवानीलाई ५४/५४ राँगा र बोकाको बली दिइन्छ ।

यस्तै नवरात्रको आठौं दिन,शक्ति पिठ बिन्दबासिनी मन्दिर पोखरामा भक्तजनको घुईचो लागेको छ । बडादशैँअन्तर्गत आज महाअष्ठमीका अवसरमा प्रसिद्ध शक्तिपीठ बिन्दबासिनी मन्दिरमा प्रसाद चढाउन बिहानैदेखि नै श्रद्धालुको भिड लागेको नेपाल बहसका डटकमका प्रधान सम्पादक इन्द्र रिजालले बताए ।

बिन्दवासिनी मन्दिर नेपालको कास्की जिल्लाको पोखरामा अवस्थित प्रसिद्ध मन्दिर हो । यो मन्दिर पोखराको प्रमूख मन्दिर मध्ये एक हो । पोखराको प्रसिद्ध शक्तिपीठ बिन्दवासिनी मन्दिरभित्र भगवतीको प्रतिमा रहेको छ ।