निस ला लिगा फुटबल : बार्सिलोनाले सेभिल्लालाई हरायो

१९ असोज, एजेन्सी । स्पेनिस ला लिगा फुटबलमा बार्सिलोनाले सेभिल्लालाई हराएको छ । आईतबार राति भएको खेलमा बार्सिलोनाले सेभिल्लालाई ४–० गोल अन्तरले हराउँदै तालिकाको दोस्रो स्थानमा उक्लिन सफल भएको छ ।

घरेलु मैदानमा भएको खेलमा बार्सिलोनालाई जिताउन लुईस स्वारेज, अर्तुरो भिडाल, उसमान डेम्बेले र लियोनल मेस्सीले समान एक एक गोल गरे । बार्सिलोना ८ खेलबाट १६ अंक जोड्यो । बार्सिलोना शीर्ष स्थानको रियल मड्रिड भन्दा मात्र दुई अंकले पछाडी रह्यो । सेभिल्ला १३ अंक सहित छैटौ स्थानमा रह्यो ।

बार्सिलोनाले ९ मिनेटको अन्तरमा तीन गोल गर्दै पहिलो हाफमा सहज अग्रता लिएको थियो । खेलको २७ औ मिनेटमा स्वारेजले गोल गर्दै बार्सिलोनालाई सुरुवाती अग्रता दिलाए ।

३२ औ मिनेटमा भिडालले घरेलु टोलीको अग्रता दोब्बर बनाए । डेम्बेलेले ३५ औ मिनेटमा गोल गर्दै पहिलो हाफमा बार्सिलोनालाई ३–० ले अघि बढाए । ७८ औ मिनेटमा मेस्सीले दर्शनिय रुपमा फ्रिकिकमा गोल गर्दै बार्सिलोनालाई ४–० को शानदार जित दिलाए ।

बार्सिलोनाबाट डेब्यु गरिरहेका रोनाल्ड अरुजो र डेम्बेले रातो कार्ड खादै मैदान बाहिरिएपछि घरेलु टोलीले ९ खेलाडीमा सिमित रहेर खेलको अन्त्य गरेको थियो ।

खेलको अन्तिममा अरुजाले ८७ औ र डेम्बेलेले ८८ औ मिनेटमा रातो कार्ड ब्यहोरेका थिए । अर्को खेलमा एट्लेटिको मड्रिडले रियल भालाडोलिडसंग गोल रहित बराबरी खेल्दै अंक बाँड्न बाध्य भयो । एट्लेटिको १५ अंक सहित तेस्रो स्थानमा उक्लियो । भालाडोलिड १० अंक जोड्दै तालिकाको १३ औ स्थानमा छ ।