प्रहरी बुलेटिन : बिहीबार कहाँ के भयो ? [थाहा पाउनुस]

२४ असोज काठमाडौं । प्रहरी प्रधान कार्यालय, प्रहरी महानिरीक्षकको सचिवालय तथा प्रहरी समाचारका अनुसार बिहीबार देशैभर भएका घटना दुर्घटना यस्ता रहेका छन् ।

काठमाडौंको टोखा नगरपालिका-११ महादेवटार हाईट बस्ने ६५ वर्षीया सिलमाया तामाङको करिब ३ तोलाको सुनको सिक्री बिहीबार बिहान लुटपाट भएको छ ।

घर अगाडि रोड छेउमा मुख धुने क्रममा हाल नम्बर नखुलेको मोटरसाइकलमा आएका व्यक्तिहरुले उक्त सिक्री लुटी फरार भएको बताइएको छ ।  लुटपाटमा संलग्न फरार व्यक्तिको खोजी गर्नुका साथै यस सम्बन्धमा प्रहरीले आवश्यक अनुसन्धान गरिरहेको छ ।

यस्तै नवलपरासी ‘पश्चिम’को  प्रतापपुर गाउँपालिका-५ बसहिया बस्ने २२ वर्षीय अभिमन्यु सिंह कुर्मीको करेन्ट लागेर बिहीबार बिहान मृत्यु भएको छ । मोटरद्वारा पानी तान्ने क्रममा मोटरको तार सर्ट भई करेन्ट लाग्दा गम्भीर घाइते भएका सिंहको उपचारका लागि शहिद स्मृति सामुदायिक अस्पताल चौपत्तातर्फ लैजाने क्रममा बाटोमै मृत्यु भएको हो ।
यस सम्बन्धमा प्रहरीले आवश्यक अनुसन्धान गरिरहेको छ ।

यस्तै  खोटाङको ऐसेलुखर्क गाउँपालिका-३ धोद्रे बस्ने ३१ वर्षीया दाल कुमारी राई छिमेको घरमा बिहीबार बिहान मृत अवस्थामा फेला परेकी छन् । संखुवासभाको सिलिचोङ गाउँपालिका-१ चिवा बस्ने ३० वर्षीय राम कवित राई बिहीबार बिहान मृत अवस्थामा फेला परेका छन् ।

सोमबार बिहान सिसुवा खोला तर्ने क्रममा खोलाले बगाई बेपत्ता भएका उनको खोजी गर्ने क्रममा शव फेला परेको हो ।
यस सम्बन्धमा स्थानीय प्रहरीले आवश्यक अनुसन्धान गरिरहेको छ ।

उता धनुषा, जनकनन्दनी गाउँपालिका-३ महुवास्थित सार्वजनिक जग्गाको घरमा बिहीबार बिहान आगलागी हुँदा ९ वटा मोटरसाइकल, ३ वटा साइकल र घर समेत जलेर करिब १५ लाख २८ हजार रुपैयाँ बराबरको धनमाल नष्ट भएको छ ।

भोजपुर, आमचोक गाउँपालिका-९ दुम्माना बस्ने दिप बहादुर श्रेष्ठको घरमा बुधबार बेलुका अगलागी हुँदा नगद, भाडावर्तन, लत्ताकपडा, अन्नपात लगायतका सरसामान जलेर करिब २ लाख ५० हजार रुपैयाँ बराबरको धनामल नष्ट भएको छ ।

स्थानीय बासिन्दाको सहयोगमा प्रहरीले आगलागी नियन्त्रणमा लिनुका साथै यस सम्बन्धमा आवश्यक अनुसन्धान गरिरहेको छ ।