सदावहार लगानीकर्ताले उठाउन सकेनन् नेप्सेको साख

२७ असोज, काठमाडौं । नेपाल स्टक एक्सचेन्जमा सदावहार लगनी गर्ने र कारोबार गर्नेलेमात्र यसको साख उठाउन नसकेको भान हुन थालेको छ । नेप्सेको लामो यात्रामा झुक्किएर कुनै दिन ग्रीन सिग्नल देखिनु बाहेक २०७६ को बडादशैं पछि खुलेको बजार अझै आह्रालो यात्रामा नै जारी देखिएको छ । निरन्तर ओह्रालो लागेको नेप्से आज पनि दोहोरो अङ्कले घट्दा लगानीकर्ता अझै पर्ख र हेरको अवस्थामा रहेको एक लगानीकर्ताले नेपालबहस डटकमलाई बताए ।

उनका अनुसार बजारका खेलाडी एवंम शेयरमा लगानी गरेर कमाउन पल्केकाहरु सँधै न्यूनतममा लगानी गरेर कसरी अधिकतम लाभ लिन सकिन्छ भन्ने मौका कुरेर बसेका हुन्छन् । त्यस्ता लगानीकर्ताहरु सुचिकृत कम्पनीले अधिकतम प्रतिफल दिने समय कुरेर बस्ने गर्छन् । मौका छोपिछोपी बजारमा पस्ने र अधिकतम मुल्य पुगेका बेला शेयर बेचेर बाहिर निस्कने प्रवृत्ति त्यस्ता लगानीकर्तामा हुन्छ ।

सदावहार लगानीकर्ताले धितोपत्र बजारमा कारोबार गरिरहे पनि शेयर कारोवार मापक नेप्से परिसूचक दोहोरो अङ्कले घट्ने क्रम रोकिएको छैन । नेपाल स्टक एक्सचेञ्जका अनुसार नेप्से आज १२.०५ विन्दुले घटेर एक हजार १३६.९६ विन्दुमा पुगेको छ ।

यस्तै सेन्सेटिभ परिसूचक २.७६ विन्दुले घटेर २४९.१७ मा झरेको छ । दशैंको बिदालगत्तै आज दोस्रो कारोवार दिनमा कूल १५४ कम्पनीको आठ लाख ३३ हजार ७५३ कित्ता शेयर रु २१ करेड ८६ लाख ३५ हजार ६९१ मूल्यमा खरीद बिक्री भए ।

कारोवार भएका कूल १२ उपसमूहमध्ये आज सामूहिक लगानी कोषको बाहेक ११ उपसमूहको शेयर ओरालो लागेको छ । सामूहिक लगानी कोष ०.०५ विन्दुले बढ्दा बैंकिङ १३.४५, व्यापार २.२८, होटल ५३.६६, विकास बैंक ११.४३, जलविद्युत् ९.०७, वित्त ६.३, निर्जीवन बीमा ४९.५३, उत्पादन १.५२, अन्य २.२१, लघुवित्त १३.८५ र जीवन बीमा ३७.१ विन्दुले घटेको छ ।

स्टकका अनुसार कारोवारका आधारमा आज प्रभु बैंकको रु दुई करोड ६५ लाख ७३ हजार १२७ मूल्यमा शेयर खरीद बिक्री भई शीर्ष स्थानमा रहेको छ । यस्तै, सिद्धार्थ बैंक रु दुई करोड ६४ लाख पाँच हजार ८९४, नबिल बैंक रु एक करोड २६ लाख २८ हजार ६७९ मा कारोवार भई शीर्ष स्थानमा रहे ।

स्टकका अनुसार राधी विद्युत् कम्पनीका शेयरधनीले ५.८४, एचआइडिसिएलका लगानीकर्ताले ४.५१ प्रतिशतले कमाउँदा सिनर्जी पावर ६.४९ र अरुण काबेलीका शेयरधनीले ५.६३ प्रतिशतले गुमाए ।