कपनबाट जुवातास खेल्ने ९ जना पक्राउ

२८ असोज, काठमाडौं । धनुषामा सुन जस्तो देखिने धातुलाई सुन हो भनी क्षिरेश्वरनाथ नगरपालिका-५ सखुवा चोकस्थित बिकेटी ज्वेलर्समा बिक्री गर्न खोज्ने ३ जनालाई सोमबार राति प्रहरीले पक्राउ गरेको छ ।

पक्राउ पर्नेहरुमा भारत गोरखपुर डेबरिया लारसमेमपुर बस्ने ५५ वर्षीय राम कुमार बर्मा, ६० वर्षीया शान्ति देवी र ३५ वर्षीया सिमा देवी रहेका छन् । सुन जस्तो देखिने धातुबाट बनेका कानको रिङ ६ थान, टप ६ थान, औंठी १ थान र लकेट १ थान उक्त पसलमा विक्री गरी ठगी गर्न खोजेको अवस्थामा ईलाका प्रहरी कार्यालय महेन्द्रनगरबाट खटिएको प्रहरीले उनीहरूलाई पक्राउ गरेको हो ।

जुवातास खेलिरहेको अवस्थामा ९ जना पक्राउ 
काठमाडौं महानगरपालिका-६ कपन भृकुटी चोक डेरा गरी बस्ने सपना राईको कोठामा जुवातास खेलिरहेको अवस्थामा सपना राई समेत ४ जनालाई नगद ७१ हजार ५ सय रुपैयाँ र १ बुक तास सहित सोमबार दिउँसो प्रहरीले पक्राउ गरेको छ ।
यसैगरी काठमाडौं महानगरपालिका-६ वौद्धस्थित नागेश्रर गल्लीमा ओखर ‘जुवा’ खेलिरहेको अवस्थामा काठमाडौं मुलपानी बस्ने ३७ वर्षीय डम्वर गुरुङ समेत ५ जनालाई नगद १ लाख ८९ हजार ८ सय २० रुपैयाँ र १८ वटा ओखर सहित सोमबार राति प्रहरीले पक्राउ गरेको छ । यस सम्बन्धमा प्रहरीले थप अनुसन्धान गरिरहेको छ ।

जबरजस्ती करणी गरेको अभियोगमा पक्राउ

ललितपुर महानगरपालिका-१७ मंगलबजार डेरा गरी बस्ने १६ वर्षीया किशोरीलाई जबरजस्ती करणी गरेको अभियोगमा सोही ठाउँ डेरा गरी बस्ने सिन्धुली दुधौली नगरपालिका-६ घर भएका २१ वर्षीय सुन्दर कार्कीलाई सोमबार राति प्रहरीले पक्राउ गरेको छ ।

कार्कीले ती किशोरीलाई आफ्नो कोठामा बोलाई ललाई फकाई जबरजस्ती करणी गरेको भन्ने खबर प्राप्त हुनासाथ महानगरीय प्रहरी प्रभाग मंगलबजारबाट खटिएको प्रहरीले उनलाई पक्राउ गरेको हो ।

उदयपुरमा १५ वर्षीया किशोरीलाई जबरजस्ती करणी गरेको अभियोगमा त्रियुगा नगरपालिका-८ बस्ने २७ वर्षीय सत्य सदालाई मंगलबार बिहान प्रहरीले पक्राउ गरेको छ । सदाले ती किशोरीलाई बिवाह गर्छु भनी ललाई फकाई प्रलोभनमा पारी गत २५ गते जबरजस्ती करणी गरेको भन्ने खबर प्राप्त हुनासाथ जिल्ला प्रहरी कार्यालय उदयपुरबाट खटिएको प्रहरीले उनलाई पक्राउ गरेको हो । यस सम्बन्धमा स्थानीय प्रहरीले थप अनुसन्धान गरिरहेको छ ।

सवारी दुर्घटनामा परी २ जनाको मृत्यु 
सुनसरी र डोटीमा भएको छुट्टाछुट्टै सवारी दुर्घटनामा परी २ जनाको मृत्यु भएको छ । सुनसरी, कोशी गाउँपालिका-४ शिवचोक कटानस्थित सडकमा को.२२ प ८०४९ र को.२९ प ६८५३ नम्बरका मोटरसाइकल एकआपसमा ठक्कर खाई सोमबार साँझ दुर्घटना हुँदा गम्भीर घाइते भएका को.२२ प ८०४९ नम्बर मोटरसाइकलका चालक उदयपुर तपेश्वर घर भएका ५० वर्षीय निरीराज बस्नेतको जिल्ला अस्पताल ईनरुवामा उपचारको क्रममा मृत्यु भएको छ ।

दुर्घटनामा घाइते भएका दुवै मोटरसाइकलमा सवार अन्य ३ जनाको सोही अस्पतालमा उपचार भइरहेकोमा २ जनालाई थप उपचारको लागि नोवेल अस्पताल बिराटनगर रिफर गरिएको छ ।

डोटी, शिखर नगरपालिका-६ चुडीस्थित सडकमा ग.१ ज ६१७० नम्बरको जिप सडकबाट करिब २ सय मिटर तल खसेर मंगलबार बिहान दुर्घटना हुँदा जिपका चालक शिखर नगरपालिका-५ तिजाली बस्ने २१ वर्षीय केशव ओझाको घटनास्थलमै मृत्यु भएको छ । दुर्घटनामा घाइते भएका जिपमा सवार ४ जना यात्रुहरूको स्थानिय क्लिनिकमा उपचार भइरहेको छ ।

विभिन्न धनमाल चोरी 
काठमाडौं महानगरपालिका-६ सिमलटार राउत गाँउ बस्ने केशव प्रसाद खतिवडाको घरबाट नगद २ लाख रुपैयाँ र सुनको १ तोलाको तिलहरी समेत गरी करिब २ लाख ७० हजार रुपैयाँ बराबरको धनमाल सोमबार दिउँसो चोरी भएको छ । चोरीमा संलग्न फरार व्यक्तिहरुको खोजी गर्नुका साथै यस सम्बन्धमा प्रहरीले थप अनुसन्धान गरिरहेको छ ।

आगलागीबाट विभिन्न धनमाल जलेर नष्ट 

खोटाङ, दिप्रुङ चुईचुम्मा गाउँपालिका-४ रातामाटा बस्ने सन्तोष सार्कीको घरमा उनकै भाइ बिनोद सार्कीले मादक पदार्थ सेवन गरी आगो लगाउँदा घर पूर्णरूपमा जलेर करिब २ लाख रुपैयाँ बराबरको धनमाल नष्ट भएको छ । आगजनी गर्ने बिनोद लाई अस्थायी प्रहरी चौकी भण्डारेघाटबाट खटिएको प्रहरीले नियन्त्रणमा लिएको छ ।

कंचनपुर, वेलौरी नगरपालिका-३ वुट्टाबारी बस्ने नैन सिंह कामीको घर र गोठमा बिद्युतको तार सर्ट भई मंगलबार बिहान आगलागी हुँदा करिब १ लाख ४० हजार रुपैयाँ बराबरको धनमाल जलेर नष्ट भएको छ ।

यसैगरी कंचनपुर, शुक्लाफाँटा नगरपालिका-११ दिपनगर बस्ने प्रताप बिष्टको गोठमा मंगलबार बिहान आगलागी हुँदा गोठ पूर्णरूपमा जलेर करिब १ लाख २५ हजार रुपैयाँ बराबरको धनमाल जलेर नष्ट भएको छ ।

स्थानीय बासिन्दा तथा दमकलको सहयोगमा प्रहरीले आगलागी नियन्त्रणमा लिनुका साथै यस सम्बन्धमा थप अनुसन्धान गरिरहेको छ ।