तोडफोड गर्ने साह पक्राउ

२८ असोज, काठमाडौं । कानून निर्माण गर्ने दायित्व प्राप्त व्यक्ति नै कानून उल्लघंनमा सकृय हुन थालेपछि जनमानसमा त्राश उत्पन्न हुनु स्वभाविक हो ।

हिजोमात्रै जनकपुर विमानस्थलमा तोडफोड गरी चर्चामा आएका सांसद् प्रमोद साह आज पक्राउ परेका छन् ।  विधायक नै कानून उल्लघंनमा उत्रिएकाले सरकार विरुद्ध आक्रोश बढेको थियो । सांसद् साह पक्राउ परेपछि सर्वसाधरणमा कानूनी राज्यको अवधारणा थोरै भएपनि जीवित रहेको अनुभूति भएको छ ।

तोडफोडपछि सांसद् साहले आफूले राम्रो गरेको प्रतिक्रिया पत्रकारहरुलाई दिएका थिए । आज विहान उनी काठमाडौंस्थित त्रिभुवन विमानस्थलबाट ओखलढुंगाका लागि उड्ने तयारी गरिरहेका बेला महानगरीय अपराध अनुसन्धान महाशाखाले उनलाई पक्राउ गरेको हो ।

सांसद साहले जहाज उड्न ढिला गरेको भन्दै जनकपुर विमास्थलस्थित बुद्ध एयरको काउन्टर तथा भीआइपी क्षेत्रमा समेत तोडफोड गरेका थिए । उपचारका लागि काठमाडौं हिँडेका एक वृद्धको स्वास्थ्य अवस्था नाजुक देखेपछि आक्रोशित भएर बुद्ध एयरको काउण्टरमा तोडफोड गरेको साहले स्वीकारेका छन् । विमानस्थलमा रहेको बुद्ध एयरको काउन्टर तोडफोड गर्ने सांसद् साहलाई उक्त जहाजले काठमाडौं ल्याउन मानेको थिएन ।

तर स्थानीय प्रशासनको दवावमा उनी सोही जहाजमा काठमाडौं आएका थिए । तोडफोड गर्ने साह विरुद्ध जनकपुरस्थित बुद्ध एयर स्टेसनका तर्फबाट उजुरी परेको थियो । जिल्ला अदालत धनुषाले सांसद् साहलाई पक्रन अनुमति दिएपछि आज पक्राउ परेका हुन् । निजी क्षेत्रका वायुसेवा सञ्चालक संघ (आयोन) ले सांसद् साहमाथि कारबाही गर्न सरकार समक्ष ७ दिने अल्टिमेटम दिएको थियो ।

राष्ट्रिय जनता पार्टीका तर्फबाट निर्वाचित साहको पक्राउप्रति पार्टीले असन्तुष्टि जनाएको छ । सर्लाहीबाट निर्वाचित साहको गिरफ्तारीप्रति राजपा महासचिव केशव झाले विरोध जनाएका छन् । पक्राउ परेका साहलाई जनकपुर पठाउने तयारी गरिएको प्रहरीले जनाएको छ ।