आलममाथि अनुसन्धानका लागि ७ दिनको म्याद थप

२८ असोज, रौतहट । १२ बर्ष अघिको बम काण्डमा पक्राउ परि निलम्बनमा परेका पूर्वमन्त्री तथा प्रतिनिधिसभा सदस्य मो. अफताव आलमलाई मंगलबार जिल्ला अदालत रौतहटले सात दिनको म्याद थपेको छ ।

न्यायाधीश चित्र बहादुर गुरुङको इज्लासले असोज २६ गतेदेखि लागू हुने गरि अनुसन्धानको लागि ७ दिनको म्याद थप गरेको हो । आलम रौतहट निर्वाचन क्षेत्र नं २ बाट प्रतिनिधिसभा सदस्य निर्वाचित छन् । कांग्रेस केन्द्रीय सदस्य समेत रहेका आलममाथि २०६४ साल चैत्त २७ गते उनको गृहनगर राजपुरमा भएको बम विष्फोट घटनाका घाइतेहरुलाई जिउँदै जलाएको आरोप छ ।

प्रहरीले आलमलाई हिरासतमा राखेर अनुसन्धान गर्न भन्दै १५ दिन मागेकोमा अदालतले ७ दिनको मात्रै म्याद थप गरेको प्रहरी प्रवक्ता डीएसपी नविन कार्कीले जानकारी दिए । नेता आलमलाई आइतबार प्रहरीले उनकै गृह जिल्लाबाट पक्राउ गरेको हो ।