टर्कीको आक्रमणपछि उत्तरपूर्वी सिरियाबाट तीन लाख सर्वसाधारण विस्थापित

३० असोज, एजेन्सी । टर्कीले उत्तरपूर्वी सिरियाको कुर्द नियणन्त्रित क्षेत्रमा गरेको आक्रमणको कारण तीन लाखभन्दा बढी मानिसलाई विस्थापित भएका मानवअधिकारवादी संस्थाले बिहीबार जानकारी दिएको छ ।

मानवअधिकारवादी संस्था ‘सिरियन अब्जरभेटरी फर ह्युमन राइट्स’का प्रमुख रामी अब्देल रहमानले यो आक्रमण शुरु भएदेखि हालसम्म तीन लाखभन्दा बढी सर्वसाधारण विस्थापित भइसकेका बताए । बाध्य भएर विस्थापित हुने व्यक्तिको संख्या अझै बढ्न सक्ने पनि उनले थप जानकारी दिए ।

विस्थापितले आफन्तसँग सुरक्षित क्षेत्रमा सर्न खोजेको भए तापनि, कोही बगँैचामा सुतिरहेका थिए, भने कोही ४० वटा विद्यालयमा आपतकालीन शरणस्थलमा पुगेका अब्देल रहमानले बताए । उत्तरपूर्वी सिरियाको कुर्दिश समर्थकले नियन्त्रण गरिरहेको क्षेत्रमा गत अक्टोबर ९ बाट हमला शुरु भएको थियो ।

उत्तरपूर्वी सिरियाबाट अमेरिकी सेना फर्काउने संयुक्त राज्य अमेरिकाको निर्णयपछि टर्कीले हवाई र स्थलगत आक्रमण शुरु गरेको थियो ।

उत्तरपूर्वी सिरियाको कुर्दिश लडाकूको नियन्त्रणमा रहेको यस इलाकाबाट राष्ट्रपति डोनाल्ड ट्रम्पले आधिकारिकरूपमा अमेरिकी सहयोग रोकेर असाधारण कदम चालेको भन्दै आलोचना भइरहेको छ ।