सद्भावना राजदूत छान्दै सरकार

३ कार्तिक,काठमाडौं । नेपाल भ्रमण वर्ष २०२० सफल पार्न सरकारले विभिन्न मुलुकमा सद्भावना राजदूत नियुक्त गर्ने भएको छ । भर्खरै सम्पन्न गैर आवासीय नेपालीहरुको संगठन एनआरएनएका नवनिर्वाचित पदाधिकारीलाई वधाई दिने क्रममा आज आयोजित एक कार्यक्रममा यस्तो जानकारी दिइएको हो ।

पर्यटन मन्त्री योगेश भट्टराईले नवनिर्वाचित पदाधिकारीलाई वधाई दिंदै भने – नेपाल भ्रमण बर्ष सफल पार्न तपाईंहरुको ठूलो भूमिका छ । गैर आवासीय नेपालीले नै यो अभियानलाई सफल बनाउन महत्वपूर्ण योगदान दिनसक्ने भएकाले तपाईंहरु मध्येबाटै सद्भावना राजदूत तोक्ने तयारीमा छौं । साथै उनले नेपालको कूल गार्हस्थ उत्पादको १० प्रतिशत भन्दा बढी हिस्सा पर्यटन क्षेत्रको बनाउन सके मुुलुक छोटो समयमै समृद्ध हुने बताए ।

कार्यक्रममा नवनिर्वाचित अध्यक्ष कुमार पन्तले नेपालको पर्यटन क्षेत्रको प्रवद्र्धनमा एनआरएनए सहयोगी हुने विश्वास दिलाए । साथै उनले नेपाल भ्रमण वर्ष २०२० सफल बनाउन एनआरएनएले विशेष तयारी गर्ने वचनवद्धता पनि जनाए ।

यसैबीच नेपाल भ्रमण वर्ष २०२० सचिवालयले एनआरएनएको नयाँ टिमसँग विशेष समझदारी भएको छ । सचिवालय र एनआरएनबीच आजै भएको १७ बुँदे समझदारीमा विश्वभरिका एनआरएन सदस्यले कम्तिमा एकजना विदेशीलाई नेपाल पठाउने मुख्य विषय रहेको छ ।

पर्यटनमन्त्री भट्टराईको उपस्थितिमा सम्पन्न समझदारीपत्रमा सचिवालयका तर्फबाट संयोजक सुरज वैद्य र एनआरएनका तर्फबाट अध्यक्ष पन्तले हस्ताक्षर गरेका छन् ।