दीपशिखा युवा क्लबको आयोजनामा चन्द्रागिरि मेयर गोल्डकप हुने

६ कार्तिक, काठमाडौं । चन्द्रागिरि ‘ए’ डिभिजन गोल्डकप फुटबल प्रतियोगिता कात्तिक ३० गतेदेखि काठमाडौँमा हुने भएको छ । नगरपालिकाले आज पत्रकार सम्मेलन गरी दीपशिखा युवा क्लबको आयोजनामा तेस्रो संस्करणको फुटबल प्रतियोगिता सञ्चालन हुने जानकारी गराएको हो ।

दीपशिखा युवा क्लबका अध्यक्ष रवी बुढाथोकीले नैकाप खेल मैदानमा उक्त प्रतियोगिता सञ्चालन हुने बताए । प्रतियोगितामा आयोजक क्लब, नगरपालिका क्लब र ‘ए’ डिभिजनका १० टोली सहभागी हुनेछन् ।

सो अवसरमा नगरपालिकाका प्रमुख घनश्याम गिरीले चन्द्रागिरिमा राष्ट्रियस्तरका खेल आयोजनाबाट नगरको आर्थिक, सामाजिक र नगरको प्रचारप्रसारमा मद्दत पुग्ने बताए । प्रतियोगिताको विजेताले रु छ लाख ५० हजार, उपविजेताले रु तीन लाख ५० हजार तथा सर्वोकृष्ट खेलाडी र सर्वाधिक गोलकर्तालाई जनही रु ३० हजार पुरस्कार प्रदान गरिनेछ । चन्द्रागिरि फुटबल प्रतियोगिताको पहिलो संस्करणमा हिमालयन शेर्पा तथा दोस्रो संस्करणमा भ्याली च्यासल युथ क्लब विजेता बनेको थियो ।