दाई ! तिमी आउने बाटो हेरेको छु !!

♥ कुसुम विश्वकर्मा

ए दाई ! तिमी आउँने बाटो हेरेको छु।
यो तिहारको बेला
यो रमझमको बेला ।।
तिमी घर आउँने किन चेष्टा गर्दैनौ ?
तिम्रो मुटु प्लाष्टिकको हो ?
संवेदना छैन तिम्रो मुटुमा ?
किन ढुङ्गा जस्तै जड भइरहेछौ ?
किन हराईरहेछौ घुमन्ते बटुवा जस्तै ।।।

यसपालीको तिहारमा मैले कति ठूलो रहर हुर्काएको थिए।
तिम्रो आकाश जस्तै फराकिलो निधारमा सप्तरङ्गी टिकाले रङ्गाउँने।
तिम्रो पवित्र गलामा सयपत्री अनि मखमलीको माला पहिराउने।
तिम्रो शत्रु बैरी नाश हाेस् भन्दै संघारमा ओखर फोर्ने ।
खै ! ती सुन्दर बसाई सरेका दिनहरु, अब त कहिले पो फर्केर आँउलान् र ?

यतिबेला म ।
खडेरीको फूलझै ओईलाई रहेछु।
ओसिलो खोचमा उम्रेको उन्यु जस्तै भइरहेछु।
तिम्रो बहिनीको कोमल मन चुडिएको छ।
मन सारै कुडिएको छ यतिबेला
ए दाई ! तिमी नआउने खबरले ।
साग जस्तै गलेका छन् मेरा अनुहार !!

तिमी नफर्किने खबरले ।
त्यसैले आगनीको डिलमा बसेर म दार्शनिक जस्तै घोत्लिरहेछु।
मनले बरम्बार भन्छ अब आगनीको छेउमा ।।
ढकमक्क सयपत्री अनि मखमली फूल्नुको अर्थ के भयो र ?

गैरी खेतमा मार्सी धान झुल्नुको अर्थ के भयो र ?
नयाँ पहुनाझै आउँने यो
तिहारको अर्थ नै के भयो र ?
तिमी नै आफ्नै माटोमा नभएपछि।।।

त्यसकारण ए दाई !
हाम्रो भत्किएको झुपडी
मसानघाट जस्तै भएको छ ।।

यसपालीको तिहारमा !
हाम्रा घरमा दियो बल्ने छैन।
बलोस् पनि कसरी दियो, बल्न तेल चाहिन्छ।
तेल लिएर छिट्टै आउछु है भनेर गएका तिमी नआएपछि ।

हो दाई, अझै पनि भोकाएका
अनुहारले कुरिरहेका छन् तिमी आउने बाटोहरु।
कुसुमका आसे आँखाहरुले हेरिरहेका छन्
दाई तिमी आउँने गोरेटाहरु ।