जुवातास खेल्दै हुनुहुन्छ ? भाईटिका लगाउन नपाइएला नि !

६ कात्तिक,काठमाडौं । हिन्दुहरुको अर्को महान चाड तिहार यतिबेला सबैको घरआँगनमा आईसकेको छ । तिहार भन्ने बित्तिकै दाजुभाई दिदीबहिनीहरु बीच भाईटिका मात्र हुदैन्, अधिकांशलाई यो जुवातास खेल्ने चाडपर्व पनि हो भन्ने लाग्दछ । हुन त तिहारमा तास,कौडा नखेलेसम्म तिहारको मज्जा लिएको नमान्ने वर्ग पनि ठूलो रुपमा छँदैछ । यो सबै नेपालीका लागि संस्कारजन्य मान्यता पनि भईसकेको छ ।

तर होस् गर्नुस है ! कतै तपाई तिहारको मौका भन्दै जुवातास खेलिरहनु भएको त छैन् ? बेर्पवाह जुवातासको मज्जा लिदाँ कतै दिदीबहिनीको हातबाट भाईटिका लगाउनबाट बञ्चित हुनु त छदैछ चाडपर्वको मौसममा प्रहरीको कस्टडीमा पनि बस्नु पर्ला ? किनभने प्रहरीले यतिबेला जुवातास नियन्त्रण गर्ने भन्दै धमाधम छापामार्ने अभियान शूरु गरेको छ । अझ तिहारका बेला बढी नै जुवातासको रमझम हुने भएकाले प्रहरी देशैभर थप सक्रिय हुनथालेको छ ।

केन्द्रिय प्रहरी समाचार कक्षका अनुसार काठमाडौं महानगरपालिका-८ गोठाटार बस्ने माया कार्कीको घरमा तास खेलिरहेको अवस्थामा रामेछाप घर भएका ५४ वर्षीय वीर बहादुर तामाङ समेत ६ जनालाई ३ बुक तास र नगद ३९ हजार ४ सय ७५ रुपैयाँ सहित मंगलबार साँझ प्रहरीले पक्राउ गरेको छ । साथै उक्त स्थानबाट मदिरा बनाउने कच्चा पदार्थ ६ सय लिटर र तयारी मदिरा ५ सय लिटर समेत फेला पारी प्रहरीले बरामद गरेको छ ।

यस्तै काठमाडौं महानगरपालिका-२८ पुरानो बसपार्कमा बा।२ ख ६४३७ नम्बरको बसभित्र तास खेलिरहेका रामेछाप दोरम्बा गाउँपालिका-६ बस्ने १९ वर्षीय हिरालाल तमार समेत ४ जनालाई नगद १३ हजार ६ सय ९० रुपैयाँ र १ बुक ताससहित मंगलबार बिहान प्रहरीले पक्राउ गरेको छ ।

यसैगरी काठमाडौं, बुढानिलकण्ठ नगरपालिका-४ भेटघाट चोक बस्ने ६० वर्षीया लक्ष्मी गुरुङको घरमा जुवातास खेलिरहेको अवस्थामा गुरुङ समेत १२ जनालाई ४ बुक तास र नगद १ लाख ७८ हजार ५ सय रुपैयाँसहित मंगलबार राति प्रहरीले पक्राउ गरेको छ । उनीहरुलाई महानगरीय प्रहरी वृत्त महाराजगंजबाट खटिएको प्रहरीले पक्राउ गरेको हो ।

त्यस्तै सुनसरी, ईनरुवा नगरपालिका-१ स्थित नम्रता होटलमा जुवातास खेलिरहेको अवस्थामा सोही ठाउँ बस्ने ३० वर्षीय प्रदिप कुमार साह समेत ७ जनालाई ८१ हजार ५ सय ७० रुपैयाँ र ६ हजार ६ सय ८० भारतीय रुपैयाँ, ७ थान मोबाइल र ताससहित बुधबार बिहान प्रहरीले पक्राउ गरेको छ । जिल्ला प्रहरी कार्यालय सुनसरीबाट खटिएको प्रहरीले उनीहरुलाई पक्राउ गरेको हो ।

यसैगरि बाँके, नेपालगंज उपमहानगरपालिका-१८ तेजनगर बस्ने काली बहादुर पुनको घरमा जुवातास खेलिरहेका सुर्खेत बीरेन्द्रनगर नगरपालिका-३ बस्ने ४१ वर्षीय हरि थापा समेत ११ जनालाई नगद ६२ हजार रुपैयाँ र ३ बुक तास सहित मंगलबार राति प्रहरीले पक्राउ गरेको छ । जिल्ला प्रहरी कार्यालय बाँकेबाट खटिएको प्रहरीले उनीहरुलाई पक्राउ गरेको हो ।

मोरङ, कटहरी गाउँपालिका-२ बस्ने २५ वर्षीय सुरेश मण्डलको घरमा जुवातास खेलिरहेका मण्डल समेत ६ जनालाई १ बुक तास र नगद ६८ हजार ९ सय ६० रुपैयाँ सहित मंगलबार साँझ प्रहरीले पक्राउ गरेको छ । जिल्ला प्रहरी कार्यालय मोरङबाट खटिएको प्रहरीले उनीहरुलाई पक्राउ गरेको हो ।

यस सम्बन्धमा स्थानीय प्रहरीले थप अनुसन्धान गरिरहेको केन्द्रिय प्रहरी समाचार कक्षले जनाएको छ ।