भेनेजुयलाका राष्ट्रपति मदुरो र प्रम ओलीबीच भेट

८ कार्तिक, बाकु । अजरबैजानको बाकुमा जारी असंलग्न आन्दोलन(नाम) को जारी १८औँ शिखर सम्मेलनका क्रममा भेनेजुयलाका राष्ट्रपति तथा नामका निवर्तमान अध्य्रक्ष निकोलस मदुरो र प्रधानमन्त्री खड्गप्रसाद ओलीबीच आज बाकु कन्भेन्शन सेण्टरमा भेटवार्ता भएको छ ।

सो अवसरमा प्रधानमन्त्री ओलीले तीन वर्षसम्म नामलाई सफलतापूर्वक नेतृत्व प्रदान गरेकामा राष्ट्रपति मदुरोलाई धन्यवाद दिए । उनीहरुबीच आपसी चासोका विषयमा पनि छलफल भएको थियो । तर के र कुन विषयमा चर्चा भयो भन्ने कुरा खुलाइएको छैन ।

भारतीय उपराष्ट्रपति र प्रम ओलीबीच भेट

शिखर सम्मेलनमा भारतको नेतृत्व गरेका भारतीय उपराष्ट्रपति भेन्कैया नायडु र प्रधानमन्त्री ओलीबीच पनि आजै भेटवार्ता भएको छ । सो अवसरमा उनीहरुबीच द्विपक्षीय हित र नामका विविध पक्षमा छलफल भएको छ ।

यसैबीच परराष्ट्रमन्त्री प्रदीपकुमार ज्ञवालीसँग आज केन्याका उपविदेशमन्त्री अबाबु नामवाम्बाले नाम शिखर सम्मेलनका क्रममा भेट गरेका थिए । नाम सम्मेलन आजै राजधानी बाकुको बाकु कन्भेन्शन सेन्टरको अडिटोरियममा शुरु भएको हो । सम्मेलनका आजै उद्घाटन, नामका नयाँ अध्यक्षको निर्वाचन र बाङ्डुङ सिद्धान्तको पालना विषयमा मन्तव्य व्यक्त गरिएको थियो ।

प्रम ओली रात्रिभोजमा सरीक

प्रधानमन्त्री जारी १८औँ शिखर सम्मेलनका सहभागीहरुको सम्मानमा आयोजित रात्रिभोजमा आज सरीक भएका छन् । अजरबैजानका राष्ट्रपति इलहाम एलिएभले प्रतिनिधिमण्डलका प्रमुखको सम्मानमा सो भोज आयोजना गरेका हुन् । सम्मेलन आजै राजधानी बाकुको बाकु कन्भेन्शन सेन्टरको अडिटोरियममा शुरु भएको हो । सम्मेलनका आजै उद्घाटन, नामका नयाँ अध्यक्षको निर्वाचन र बाङ्डुङ सिद्धान्तको पालना विषयमा मन्तव्य व्यक्त गरिएको थियो ।