प्रधानमन्त्रीका एडिसी जुवाखालबाट पक्राउ

१६ कार्तिक, काठमाडौं । प्रधानमन्त्री खड्गप्रसाद ओलीका सुरक्षागार्ड (एडिसी) लाई नै जुवाखालबाट पक्राउ परेका छन् । काठमाडौंको सामाखुसीबाट ओलीका सुरक्षागार्ड मेजर राजेन्द्रबहादुर शाहीसहित आठजना जुवाडे शुक्रबार पक्राउ परेका हुन् ।

बिदामा बसेका दिन शाही जुवाखालबाट समातिएका हुन् । महानगरीय प्रहरी प्रभाग गोंगबुले उनीहरुलाई शुक्रबार राति एक लाख ५९ हजार रुपैयाँ नगदसहित सोमबहादुर मगरको घरमा चलाइएको जुवाखालबाट पक्राउ गरेको हो ।

पक्राउ पर्ने अन्यमा टोखा नगरपालिका १० का सोमबहादुर मगर, मानकाजी गुरुङ र धर्म शाह रहेका छन् । रामेछापको सुनापतिका बुद्धिलाल मगर, गोरखाका जित गुरुङ, किरणजंग शाह र सुर्खेत खानीखोलाका निरज राणा पनि जुवाखालबाट पक्राउ परेका छन् । शाहीलाई प्रहरीले नेपाली सेनाको जिम्मा लगाउने तयारी गरेको छ । यसअघि काठमाडौंको महाराजगञ्जबाट प्रहरीले २ करोड ६७ लाखसहित २५ जना धनाढ्य जुवाडेलाई पक्राउ गरेको थियो ।