महराको पक्षमा दुई दर्जन वकिल,थुनछेक बहस शुरु

१७ कात्तिक,काठमाडौं । पूर्वसभामुख कृष्णबहादुर महरालाई थुनामै राखेर अनुसन्धान गर्नुपर्ने वा नपर्ने भन्ने विषयमा काठमाडौं जिल्ला अदालतमा आजदेखि थुनछेक बहस सुरु भएको छ ।

जिल्ला न्यायाधीश सुदर्शनराज पाण्डेको इजलाशमा सुरु भएको थुनछेक बहसमा अहिले सरकारी वकिलले थुनामै राखी अनुसन्धान गर्नुपर्ने तर्क राखेका छन् । उच्च पदमा रहेका महरा हिरासत बाहिर हुँदा उनी विरुद्धको प्रमाण नष्ट गर्नसक्ने भएकाले थुनामै राख्नु पर्ने जिकिर सरकारी वकिलको रहेको छ ।

सरकारी वकिलको बहस सक्किएपछि महराका पक्षबाट कानून व्यवसायीले बहस गर्ने भएका छन् । महराका तर्फबाट २५ जना कानून व्यवसायीले वकालतनामा दर्ता गरेका छन् । ती मध्ये पूर्व महान्याधिवक्ता रमणकुमार श्रेष्ठ , पूर्व बार अध्यक्ष शेरबहादुर केसी लगायत रहेका छन् ।

सबै कानून व्यवसायीले बहस गर्ने अवस्था आयो भने समय अभावका कारण बहस नसकिने भएकोले आज पनि थुनछेक आदेश नहुन सक्छ ।