प्रधानमन्त्रीको धपेडीकाबीच मन्त्रीपरिषद बैठक सकियो

१७ कार्तिक, काठमाडौं । प्रधानमन्त्रीको धपेडीकाबीच आज प्रधानमन्त्री निवास बालुवाटारमा बसेको मन्त्रिपरिषद् बैठक डेढघण्टा बसेर सकिएको छ।

गत बुधबार प्रधानमन्त्री खड्गप्रसाद ओली मिर्गौलाको डायलासिस गराएर फर्किएपछि आज पहिलो पटक मन्त्रिपरिषद् बैठक बसेको हो । यसअघि आज नै प्रधानमन्त्री ओलीले टीचिङ अस्पताल महाराजगञ्जमा गएर फोक्सोको एक्सरे गरेका थिए।

आजको मन्त्रिपरिषद् बैठकले डाक्टर भगवान कोइरालालाई नेपाल मेडिकल काउन्सिलको अध्यक्ष बनाउने निर्णय गरेको छ। मुटु रोग विशेषज्ञ डाक्टर कोइराला यसअघि त्रिवि शिक्षण अस्पतालका कार्यकारी निर्देशक र शहीद गंगालाल हृदय रोग केन्द्रका निर्देशक भएर काम गरेका थिए।

शिक्षा मन्त्री गिरिराजमणि पोखरेल नेतृत्वको समितिले कोइरालाको नाम त्रिभुवन विश्वविद्यालयको उपकुलपतिका लागि सिफारिस गरेको थियो। आजको मन्त्रिपरिषद्ले गरेका थप निर्णयबारे पुरा जानकारी भने आउन बाँकी छ ।